आदिवासींचा मोर्चा मुंबईला नेऊ

सकाळ वृत्तसेवा
नाशिक, ता. ३ : आदिवासी वसतिगृहातील असुविधांच्या विरोधात गेल्या १२ दिवसांपासून नाशिकमध्ये सुरू असलेले उपोषण स्थगित करून युवकांनी आंदोलन चालू ठेवावे. या आंदोलनाची व्याप्ती राज्यभरात वाढवून आपण दिल्लीतील जंतरमंतर प्रमाणे सकल आदिवासींचा मोर्चा थेट मुंबईला घेऊन जावू आणि आदिवासी विकास मंत्र्यांना राजीनामा द्यायला भाग पाडू, असा इशारा देत कॉक्रोज जनता पक्षाचे संस्थापक अभिजित दिपके यांनी गुरूवारी आदिवासी युवकांच्या आंदोलनाला जाहीर पाठिंबा दिला.
काँग्रेस नेते राहुल गांधी, शिवसेना (यूबीटी) पक्षाचे नेते आदित्य ठाकरे यांच्या पाठोपाठ ‘सीजेपी’चे संस्थापक दिपके यांनी आदिवासी उपोषणकर्ते व आंदोलकांची भेट घेतली. आज दुपारी दीडला ठाकरेंनी येथे भेट दिल्यानंतर अवघ्या पाच तासांनी दिपके इदगाह मैदानावर दाखल झाले. दिपके यांनी उपोषणकर्त्यांशी चर्चा केली. त्यांचे प्रश्‍न जाणून घेतले. गेल्या दोन वर्षात ५९० विद्यार्थ्यांचा वसतिगृहात मृत्यू झाला. त्याची चौकशी व्हायला हवी. मंत्री उपोषणकर्त्यांच्या भेटीला आले आणि हसत-हसत गाडीत बसून निघून गेले. तुमच्या मुलीला सर्पदंश झाला असता तर तुम्ही असेच हसत गेला असता का? असा प्रश्‍न दिपकेंनी उपस्थित केला.
उपोषण करून आपला जीव देण्यापेक्षा आपल्या अधिकारांसाठी दिल्लीतील जंतर मंतरप्रमाणे मुंबईत आंदोलन उभे करु. आदिवासींचे आंदोलन हे तुमच्या नेतृत्वात होईल, असे नियोजन करा. त्याला आम्ही पाठिंबा देवू आणि आपण सोबतच मुंबईत जावून आंदोलन करु, असा इशारा त्यांनी दिला.

आश्रमशाळांना भेटी देणार
राज्यातील जिल्हा परिषद शाळांची पोलखोल केल्यानंतर अभिजित दिपके यांनी आपला मोर्चा आता आदिवासी विकास विभागाच्या आश्रमशाळांकडे वळविला आहे. या शाळांना अचानक भेटी देऊन त्यांची पोलखोल करणार असल्याचा निर्धार व्यक्त केला.