पुणे : दिवाळीमुळे आई-वडीलांनी त्यांच्या लाडक्या आयुषला नवीन कपडे घातले. त्यानंतर तो काका-आजोबांबरोबर दिवाळीच्या खरेदीसाठी घराबाहेर पडला. आजोबा दुकानात वस्तू घेत होते, अडीच वर्षांचा आयुष रस्त्यापासून काही अंतरावर खेळत होता. त्याचवेळी सोसायटीतून बाहेर पडणाऱ्या एका कारची त्याला धडक बसली. डोक्याला दुखापत झालेल्या आयुषला रुग्णालयात नेले. पण नियतीला त्याचे निरागस खेळणे मान्य नव्हते, ऐन दिवाळीच्या दिवशी नियतीने आयुषचे 'आयुष्य' संपविले !
टाईल्स ठेकेदार असलेल्या दत्ता साबणे यांचा अडीच वर्षांचा मुलगा आयुष. मुळचे बीडचे असले साबणे कुटुंबीय कामानिमित्त वारजे माळवाडी येथील नवीन अहिरे गाव येथे स्थायिक झाले. आई-वडीलांनी दिवाळीसाठी आयुषला नवीन कपडे खरेदी केली होती. शनिवारी लक्ष्मीपुजन होते. त्यासाठी किराणा दुकानातून काही वस्तु आणायच्या असल्याने आयुषचे आजोबा व काका दिगंबर साबणे आयुषला त्यांच्यासमवेत घेऊन वारजे माळवाडी येथील गणपती माथ्यावरील केसरीया ट्रेडर्स या दुकानामध्ये खरेदीसाठी गेले. दोघेजण वस्तू घेत होते. त्यावेळी आयुष दुकानापासून काही अंतरावर खेळत होता. त्याचवेळी तेथील सोसायटीतून बाहेर पडणारी कार वळत असतानाच आयुषला कारची धडक बसली. या अपघातात आयुषच्या डोक्याला गंभीर दुखापत झाली. काका व आजोबांनी त्यास तत्काळ रुग्णालयात दाखल केले. मात्र डोक्याला जबर मार बसल्यामुळे उपचारांपुर्वीच त्याचा मृत्यू झाला.
याप्रकरणी आयुषचे काका दिगंबर साबणे (वय 25, रा.दिनानाथ वांजळे चाळ, लक्ष्मीमाता मंदिरासमोर, गणपती माथा, वारजे माळवाडी) यांनी वारजे माळवाडी पोलिस ठाण्यात फिर्याद दिली. त्यावरुन कारचारक गणेश मारुती जोशी (वय 45, रा. नवी सांगवी) यास अटक करण्यात आली. या प्रकरणाचा तपास सहाय्यक पोलिस निरीक्षक बापु रायकर करीत आहेत.
पिंपरी-चिंचवडच्या बातम्या वाचण्यासाठी येथे ► क्लिक करा
"कोरोना वॉरीयर्स' हिरावला !
दिवाळीसाठी आयुषला नवीन कपडे घेतली होती. फुल बाह्यांचा लाल-पांढरा शर्ट, निळ्या रंगाची जीन्स घालून आयुष बागडत होता. आयुषच्या जीन्सवर 'कोरोना वॉरीयर्स' असा उल्लेख होता. सध्याच्या कोरोनाच्या काळात 'कोरोना वॉरीयर्स'ची पॅंट परिधान करून त्याविरुद्ध लढा देण्यासाठी तयार असणारा हा छोटा योद्धा अपघाताने त्याच्या कुटुंबापासून कायमचा हिरावून नेला.
..आणि पोलिसांच्या अश्रूंचा बांध फुटला
पोलिसही शेवटी माणूसच असतो. आयुषचा अपघात झाल्यानंतर त्याला उपचारासाठी रुग्णालयात दाखल केले. मात्र त्याचा मृत्यू झाल्यामुळे पोलिसांना खबर देण्यात आली. वारजे माळवाडी पोलिस पंचनामा करण्यासाठी रुग्णालयात दाखल झाले. डोक्याची गंभीर दुखापत वगळता कुठेही दुखापत नसेल्या चिमुकल्या आयुषचा देह पाहून पोलिसांचेही काळीज द्रवले. ऐन दिवाळीच्या दिवशी एका चिमुकल्याच्या मृतदेहाचा पंचनामा करण्याची वेळ आलेल्या पोलिस अधिकाऱ्याने घरी गेल्यानंतर आपल्या अश्रूंना मोकळी वाट करून दिली
धक्कादायक! सूडाच्या भावनेतून सशस्त्र टोळक्याने केले अल्पवयीन मुलीचे अपहरण
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.