शिरूर : शिरूर येथील ५३ वर्षीय फोटोग्राफरचा काल मृत्यू झाल्यानंतर आज दुस-या दिवशी तालुक्यातील दुडेवाडी येथील एक कामगार व निमगाव म्हाळुंगी येथील ज्येष्ठाचा मृ्त्यू झाला. त्यामुळे शिरूर तालुक्याला जबर हादरा बसला आहे. कोरोनाच्या फे-यात तालुक्यातील मृतांची संख्या आता नऊ झाली असून, एकूण बाधितांची संख्या २१५ झाली आहे.
निमगाव म्हाळुंगी येथील ५८ वर्षीय ज्येष्ठ नागरिकावर पुण्यातील खासगी रूग्णालयात गेल्या बरेच दिवसांपासून उपचार चालू होते. या दरम्यान त्यांचा कोरोना रिपोर्टही पॉझिटिव्ह आला होता. आज सकाळी उपचारादरम्यान त्यांचे निधन झाले असल्याची माहिती तालुका आरोग्य अधिकारी डॉ. आर. डी. शिंदे यांनी दिली. या ज्येष्ठाच्या मृत्यूमुळे निमगाव परिसर हादरला असून, शिक्रापूर, तळेगाव ढमढेरे व निमगाव परिसरातील कोरोनाचा फास सुटण्याऐवजी आणि आवळला जात असल्याचे स्पष्ट झाले आहे.
चाकण एमआयडीसीतील खासगी कंपनीत काम करणारा आणि तेथेच वास्तव्यास असलेला एक तीस वर्षीय कामगार गेल्या काही दिवसांपासून तब्बेत बरी नसल्याने शिरूर तालुक्यातील टाकळी हाजीजवळील दुडेवाडी या मूळगावी आला होता. उपचार करूनही प्रकृतीत सुधारणा न झाल्याने सध्या तो घरीच होता. त्याचा काल रात्री उशीरा मृत्यू झाला. त्याची कोरोना टेस्ट करण्यात आली होती. त्या टेस्टचा रिपोर्ट आज आला असून, तो पॉझिटिव्ह असल्याचे डॉ. शिंदे यांनी स्पष्ट केले.
शिरूर शहरातील सरदार पेठ व सुभाष चौक या भागात प्रत्येकी एकाला कोरोनाची बाधा झाली असून, तो परिसर नगर परिषदेने आज सील केला. शहरातील रूग्णांची संख्या ३३ झाल्याने व गेल्या आठवडाभरात रूग्णसंख्येत झपाट्याने वाढ झाल्याने नगर परिषदेने दहा दिवसांचा लॉकडाउन जाहिर केला आहे. त्यात सुरवातीचे पाच दिवस संपूर्ण लॉकडाउन तर; पुढील पाच दिवस काही शिथिलता आणून हे लॉकडाउन पाळले जाणार असल्याचे नगर परिषदेचे मुख्याधिकारी महेश रोकडे
यांनी सांगितले.
शिरूर तालुक्यातील रूग्णसंख्याही वाढत चालली असून, आज दिवसभरात शिक्रापूर परिसरात चार कोरोनाबाधित सापडले. तर पिंपळसुटी, करंदी, करडे, तळेगाव ढमढेरे येथे प्रत्येकी एकाला कोरोनाची बाधा झाली. त्यांच्या संपर्कातील साठ जणांना होम क्वारंटाइन केले असल्याची माहिती आरोग्य विभागाने दिली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.