चिमुकले विचारताहेत मम्मी-पप्पा केव्हा येणार?

कोळवण : मम्मी-पप्पा काल कामाला गेले परंतू अजूनही ते घरी का आले नाहीत.. असा प्रश्न पाच वर्षीय आर्यन व सहा वर्षीय संस्कृती आपल्या काका व आजोबांना सारखा विचारत आहेत.. परंतू यावर चिमुकल्यांना काय उत्तर द्यावे हे त्यांना समजतच नाहीये. कारण आई सुनीता या मुळशीतील उरवडे येथील कंपनीला लागलेल्या आगीत मृत झाल्या आहेत, तर या चिमुकल्यांचे वडील राहुल मृत झालेल्या पत्नीची ओळख पटवण्यासाठी दवाखान्यात गेले होते...

उरवडे येथील दुर्घटनेनंतर निसर्गरम्य डोंगराच्या कुशीत वसलेल्या भालगुडी (ता. मुळशी) गावावर शोककळा पसरली. या कंपनीमध्ये भालगुडीतील सहा जण तीन दुचाकीवर दररोज जात. या सहा जणांपैकी सुनीता राहुल साठे (वय २८), अतुल बाळू साठे (वय २२) हे दोघे मृत झाले. संतोष सीताराम साठे (वय २४), आदिनाथ महिपती साठे (वय २१) हे गंभीर जखमी असून, पुण्यातील हॉस्पिटलमध्ये उपचार घेत आहेत. राहुल सीताराम साठे (वय ३०), सचिन भरत साठे (वय २४) हे दोघे बचावले. मयत सुनीता राहुल साठे यांचे पती राहुल सीताराम साठे यांनी सुनीता यांना वाचवण्याचे प्रयत्न केले, परंतू आगीच्या झळा तीव्र असल्याने सुनीता यांना ते वाचवू शकले नाहीत. तर राहुल यांचा सख्खा भाऊ संतोषही यात जबर जखमी झाला. तर आदिनाथ हा कंपनीच्या बाथरूममध्ये अडकून पडला होता, त्याला सचिन यांने प्रसंगावधान राखून बाहेर काढल्याने आदिनाथ जखमी होऊन यातुन बचावला. या घटनेमुळे गावातील नागरिक दुःखी झाले असून, गावात भयाण शांतता पसरली आहे.

मृत झालेल्या सुनीता यांना संस्कृती (वय ६) व आर्यन (वय ५) ही दोन लहान मुलं आहेत. अज्ञान असल्याने मम्मी-पप्पा कुठे गेले? घरातील आजोबा, काकु, काका यांच्या डोळ्यात पाणी का आहे? आपले पाहुने घरी येऊन रडत का आहेत? असे प्रश्न त्यांना पडत आहेत. आईच्या नसन्याने ते कासावीस झाले आहेत. तर घरातील लग्नाला आलेला तरुण मुलगा अतुल हा मृत झाल्याने आई-वडील, भाऊ-बहीण, आजी रडून कासावीस झाले आहेत.