घोडेगाव (पुणे) : आंबेगाव तालुक्याच्या आदिवासी भागातील आपटी येथे मागील वर्षी आपटी ते ठाकरवाडी ते गंगापूर खुर्द या साडेतीन किलोमीटर रस्त्याच्या मुरमीकरणाचे काम झाले होते. मात्र, गेल्या वर्षी पहिल्या पावसातच या रस्त्याचा काही भाग तुटला व रस्त्याच्या मोऱ्या तुंबून मातीने गाडल्या होत्या. हा रस्ता ग्रामस्थांनी श्रमदानाने डागडुजी करून वाहतुकीस योग्य केला.
शासनाने या रस्त्याच्या पुढील कामासाठी निधी टाकला नव्हता व त्यात भर म्हणून कोरोनाच्या संसर्गात सरकारचा घसरता आर्थिक आलेख पाहता पुढील काही वर्षी रस्त्यासाठी निधी मिळेल, अशी तुरतास शक्यता वाटत नव्हती. मात्र, रस्त्याची डागडुजी करणे अत्यंत गरजेचे होते. अन्यथा कधी नव्हे तो झालेला हा रस्ता पावसाळ्यात पार धुऊन गेला असता. त्यानंतर या रस्त्याने पायीसुद्धा येणे अशक्य झाले असते. हा धोका ओळखून आणि सरकारच्या आर्थिक परिस्थितीची अडचण समजून घेऊन गावातील सर्व लोक एकत्र आले. त्यांनी रस्ता दुरुस्त करण्याचा निर्णय घेतला.
रस्त्याच्या या कामासाठी निधीची गरज होती. त्यासाठी कोरोनामुळे बंद झालेल्या यात्रेची वर्गणी दरवर्षीप्रमाणे गोळा केली. पुणेकर व मुंबईकर नोकरदार मंडळाच्या सदस्यांनी सध्याच्या कठीण काळातही आपल्या खिशाला बसणारी जास्तीची झळ सोसली. त्यांना जमेल तेवढी आर्थिक मदत जमा करून गावाला पाठवून दिली. कोरोनाच्या पार्श्वभूमीवर ग्रामस्वच्छता करून कामाला सुरवात केली. या वर्षी नव्याने स्थापन झालेल्या युवकांच्या ग्राम विकास समितीने गावातील जुन्या जाणत्या कारभारी मंडळींच्या मार्गदर्शनाने रस्त्याच्या कामासाठी जेसीबी ठरवून कामाला सुरवात केली.
पुण्याच्या इतर बातम्या वाचण्यासाठी येथे क्लिक करा
महत्त्वाचं म्हणजे, या संपूर्ण 10 दिवसांच्या कामात गावातील सर्व नागरिकांनी श्रमदान केलं. पुढच्या काळात येणाऱ्या संकटाला सामोरे जात रस्त्याच्या कडेने गटार खोदणे, गाडलेल्या मोऱ्या खुल्या करणे व तुटलेल्या रस्त्यावर बांध घातला. रस्त्याच्या डागडुजीचे अत्यंत महत्त्वाचं काम पूर्ण केलं.
आदिवासी भागातील या आपटी गावच्या शाश्वत विकासासाठी कंबर कसलेल्या युवकांच्या समितीने काही दिवसांत गावात लोकसहभागातून ग्रंथालयाची स्थापना करण्यात येणार असल्याची घोषणा समितीचे अध्यक्ष अविनाश गवारी व सचिव दत्ता गवारी यांनी ग्रामस्थांच्या वतीने बैठकीत केली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.