
कर्नाटक राज्यातील धारवाड येथे २४ ऑगस्ट रोजी होणाऱ्या एका कार्यक्रमात विराजला पुरस्कार प्रदान केला जाणार आहे.
पुणे - संगीत क्षेत्रातील उल्लेखनीय कामगिरीसाठी कर्नाटक सरकारतर्फे दिला जाणारा ‘युवाप्रशस्ती राष्ट्रीय पुरस्कार’ यंदा पं. भीमसेन जोशी यांचा नातू आणि पं. श्रीनिवास जोशी यांचा पुत्र व शिष्य गायक विराज जोशी याला जाहीर झाला आहे. विशेष म्हणजे विराज हा पुरस्कार मिळविणारा सर्वात कमी वयाचा मानकरी ठरला आहे.
कर्नाटक राज्यातील धारवाड येथे २४ ऑगस्ट रोजी होणाऱ्या एका कार्यक्रमात विराजला हा पुरस्कार प्रदान केला जाणार आहे. किराणा घराण्याचे गायक पं. बसवराज राजगुरू यांच्या नावाने संगीत क्षेत्रातील उदयोन्मुख कलाकारांना कर्नाटक सरकारतर्फे दरवर्षी हा पुरस्कार दिला जातो. रोख रक्कम पंचवीस हजार रुपये आणि सन्मानचिन्ह, असे या पुरस्काराचे स्वरूप आहे.
विराजने आतापर्यंत भारतात विविध ठिकाणी सुमारे शंभरहून अधिक कार्यक्रमांमध्ये आपले गायन सादर केले आहे. यामध्ये प्रतिष्ठित असा सवाई गंधर्व भीमसेन महोत्सव, मुंबई येथील काला घोडा महोत्सव, भारत भवन, भोपाल यांचा समावेश आहे. त्याने परदेशात सुमारे पंचवीसहून अधिक कार्यक्रम केले आहे. मुंबई येथील षणन्मुखानंद सभा यांच्यातर्फे दिली जाणारी संगीत क्षेत्रातील मानाची अशी डॉ. एम. एस. सुब्बलक्ष्मी विद्यावृत्ती त्याला मिळाली आहे. तो सध्या एमआयटी विश्वशांती विद्यापीठात बी ए लिबरल आर्ट्सच्या द्वितीय वर्षात शिक्षण घेत आहे.
‘पं. बसवराज राजगुरू यांच्या नावाने मिळालेला हा पुरस्कार माझ्यासाठी खूप महत्त्वाचा आहे. यासाठी मी कर्नाटक सरकारचे आभार मानतो. अशा पुरस्कारामुळे संगीत क्षेत्रात आणखी काम करण्याची ऊर्जा आणि प्रोत्साहन मिळते.’
- विराज जोशी
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.