वाघोलीतील प्लॅस्टिक मालाच्या गोडाऊनला भीषण आग

पुणे : प्लॅस्टिकच्या (plastic) टाकाऊ माल असणाऱ्या गोडाऊनला शनिवारी पहाटे दोन वाजता आग लागल्याची घटना घडली. या आगीच्या घटनेत गोडाऊन जळून खाक झाले. पुणे महापालिका (pune corporation) व पीएमआरडीए (PMRDA) अग्निशमन दलाच्या जवानांनी ही आग आटोक्यात आणली. ही घटना वाघोली (wagholi) येथे घडली.

वाघोली येथील भावडी रोड परिसरात प्लॅस्टिकच्या टाकाऊ मालाचे गोडाऊन व पत्रा शेड आहे. या गोडाऊनला शनिवारी पहाटे 2 वाजता आग लागली. याबाबत पुणे मध्यवर्ती अग्निशामक नियंत्रण कक्षाला खबर मिळाली. त्यानंतर महापालिका अग्निशामक दल व पीएमआरडीए अग्निशमन दलाच्या गाड्या तत्काळ घटनेच्या ठिकाणी दाखल झाल्या. प्लॅस्टिकच्या टाकाऊ माल असल्याने आगीने मोठ्या प्रमाणात पेट घेतला.

अग्निशामक दलाच्या जवानांना सकाळी 7 वाजता आगीवर नियंत्रण मिळविण्यात यश आले. आग कशामुळे लागली आणि किती नुकसान झाले, याबाबत माहिती मिळाली नाही, या घटनेत कोणीही जखमी झाले नाही, अशी माहिती अग्निशामक दलाच्यावतीने देण्यात आली.