Wagholi Rain Update : पाऊण तासाच्या अवकाळी पावसाने वाघोलीची दैना

Wagholi News : मंगळवारी सायंकाळी पडलेल्या पाऊण तासाच्या अवकाळी पावसाने वाघोलीची दैना उडाली. भावडी रोडला नदीचे स्वरूप आले. जोरदार वाऱ्यामुळे अनेक ठिकाणच्या कमानी, बोर्ड तुटले तर अनेक होर्डींगच्या फ्लेक्सचे कापड फाटून इतरत उडाले. पुणे नगर महामार्गालगतही काही ठिकाणी पाणी साचले.

मंगळवारी सायंकाळी सहा वाजण्याच्या सुमारास जोरदार वारे वाहू लागले. यानंतर काही वेळाने पावसाला सुरुवात झाली. पावसाचा जोरही वाढला. वाऱ्याचे प्रमाण ही अती होते. सुमारे पाऊण तासाच्या पावसाने भावडी रोडला अक्षरशः नदीचे स्वरूप आले.

या पाण्यातून वाट काढत त्या भागातील नागरिकांना जावे लागले. बुधवारी सुद्धा या रस्त्याला नदीचे स्वरूप होते. जोरदार वाऱ्यामुळे रोडला लावलेल्या लोखंडी कमानी ही तुटल्या. अनेक ठिकाणचे बोर्ड वाकले. विद्युत पोल व मिळेल त्या जागी लावलेल्या फ्लेक्स तुटून पडले.

मोठ्या होर्डिंगला लावलेया फ्लेक्सचे कापड फाटून ते इतरत्र पडले. या पावसाने विद्युत पुरवठाही खंडित झाला होता. पुणे नगर महामार्गालगत काही ठिकाणी पाणी साचले होते. अनधिकृत फ्लेक्सचे जाळे पुन्हा मोठ्या प्रमाणावर वाढले आहे. मात्र याकडे कोणाचेही लक्ष नाही. अवकाळी पाऊण तासाच्या पावसाने वाघोलीची ही दैना झाली तर पावसाळ्यात काय स्थिती होईल हे सांगणेच कठीण आहे. असा नागरिकांचा सुर आहे.