सेवेसाठी "पीएमपी'ला प्रतीक्षा दोन्ही पालिकांच्या आदेशाची 

पुणे - पीएमपीची सेवा सुरू करण्यासाठी 3 सप्टेंबरचा मुहूर्त निवडला असला तरी त्याबाबतचे आदेश द्यावेत, यासाठी पीएमपी प्रशासनाने दोन्ही महापालिकांना स्मरणपत्र पाठविले आहे. तसेच बस सेवा सुरू करण्याचा आराखडाही सादर केला आहे. त्यामुळे दोन्ही महापालिकांच्या आदेशाकडे पीएमपीचे लक्ष लागले आहे. 

पुणे आणि पिंपरीमध्ये बस सुरू करण्याचा निर्णय पुण्याचे महापौर मुरलीधर मोहोळ आणि पिंपरी-चिंचवडच्या महापौर माई ढोरे यांच्या बैठकीत 20 ऑगस्ट रोजी झाला. दोन्ही महापालिकांच्या आयुक्तांनीही त्याला ग्रीन सिग्नल दिला. मात्र, पीएमपीची सेवा सुरू करण्यासाठी दोन्ही महापालिकांनी अद्याप आदेश काढलेला नाही. त्याशिवाय पीएमपीची सेवा सुरू होऊ शकत नाही. 

ताज्या बातम्यांसाठी डाऊनलोड करा ई-सकाळचे ऍप

दरम्यान, पहिल्या टप्प्यात 25 टक्के बस रस्त्यावर उतरविण्याचे नियोजन पीएमपीने केले असून, त्यासाठी 421 बसचे सॅनिटायझेशन करण्यात आले आहे, अशी माहिती पीएमपीचे अध्यक्ष आणि व्यवस्थापकीय संचालक राजेंद्र जगताप यांनी दिली. 

दिवसातून तीन वेळा बसचे सॅनिटायझेशन करण्यात येणार आहे. त्यासाठी दोन्ही शहरांतील 14 आगारांत व्यवस्था करण्यात आली आहे. तसेच नव्या बसमधील एसी यंत्रणा बंद ठेवून सेवा सुरू करण्यात येईल. प्रत्येक बसमध्ये 22 पेक्षा जास्त प्रवासी नसतील, अशी सूचना वाहक आणि चालकांना देण्यात आली आहे. 

जगभरातील इतर बातम्या वाचण्यासाठी येथे क्लिक करा

थांब्यांवर प्रवाशांसाठी मार्किंग 

दोन्ही शहरांतील प्रतिबंधित क्षेत्र वगळून सर्व प्रमुख मार्गांवर वाहतूक सुरू करण्यात येईल. कोणत्या मार्गांवर किती बस धावतील, याचीही माहिती दोन्ही महापालिकांना सादर करण्यात आली आहे. तसेच सर्व प्रमुख बस थांब्यांवर प्रवाशांनी कोठे थांबायचे, यासाठी मार्किंग करण्यात आले आहे, अशी माहिती जगताप यांनी दिली. 

देशभरातील इतर बातम्या वाचण्यासाठी येथे क्लिक करा