Breaking : खडकवासला धरणातून आज मुठा नदीपात्रात विसर्ग वाढविला

पुणे : वरसगाव धरण पूर्ण भरण्याच्या मार्गावर असून, खडकवासला धरणातून मुठा नदीपात्रात रविवारी (ता. 23) दुपारी दोन वाजल्यापासून पाच हजार 136 क्‍युसेकने विसर्ग सुरु करण्यात आला आहे.

खडकवासला धरण साखळीतील पानशेत आणि खडकवासला ही दोन्ही धरणे पूर्ण क्षमतेने भरली आहेत. त्यापाठोपाठ आता वरसगाव धरणही 98 टक्के भरले आहे. तर, टेमघर धरणातही 82 टक्के पाणीसाठा झाला आहे. काल पावसाचा जोर असल्यामुळे खडकवासला धरणातून नदीपात्रातील विसर्ग बंद करण्यात आला होता. परंतु, धरणाच्या पाणलोट क्षेत्रात पुन्हा पाऊस सुरू झाला. त्यामुळे खडकवासला धरणातून आज दुपारी दोन वाजल्यापासून विसर्ग वाढवण्यात आल्याची माहिती खडकवासला पाटबंधारे विभागाचे कार्यकारी अभियंता विजय पाटील यांनी दिली.

- ताज्या बातम्यांसाठी डाऊनलोड करा ई-सकाळचे ऍप 

- पुण्याच्या बातम्या वाचण्यासाठी येथे क्लिक करा

नीरा देवघर धरणही जवळपास पूर्ण भरले असून,  नीरा नदीत 750 क्‍युसेकने विसर्ग सोडण्यात येत आहे. त्यामुळे नदीपात्राच्या परिसरातील नागरिकांना सतर्कतेचा इशारा देण्यात आला आहे.

खडकवासला प्रकल्पातील टेमघर, वरसगाव, पानशेत आणि खडकवासला या चार धरणांत एकूण 28.23 अब्ज घनफूट (टीएमसी) म्हणजे 96.83 टक्के इतका पाणीसाठा झाला आहे. गतवर्षी 28.99 टीएमसी (99.43 टक्के) पाणीसाठा होता. सकाळपर्यंत टेमघर धरणाच्या पाणलोट क्षेत्रात 52 मिलिमीटर, वरसगाव 21 मिलिमीटर, पानशेत 22 मिलिमीटर आणि खडकवासला धरणाच्या पाणलोट क्षेत्रात एक मिलिमीटर पाऊस झाला. 

खडकवासला प्रकल्पातील पाणीसाठा टीएमसीमध्ये, कंसात टक्केवारी : 

• टेमघर 3.05 (82.11)
• वरसगाव 12.56 (97.97)
• पानशेत 10.65 (100)
• खडकवासला 1.97 (100)

इतर धरणांतील पाणीसाठा

• भामा-आसखेड 6.23 (81.23)
• पवना 7.48 (87.96)
• मुळशी 18.46 (100)
• भाटघर 23.50 (100)
• नीरा देवघर 11.58 (98.72)
• वीर 9.41 (100)
• उजनी 41.73 (77.88)