अवघडच झालंय, लग्न धुमधडाक्‍यात नव्हे; चोरी चोरी चुपके चुपके! 

आळंदी (पुणे) : लॉकडाउन काळात मंगल कार्यालयांना परवानगी नाही. मात्र, तरीही काही मंगल कार्यालयांत चोरून लग्न लावली जात असल्याचे चित्र आळंदीत आहे. पोलिस आणि पालिका मात्र त्याकडे सोईस्कर दुर्लक्ष करत आहेत. आळंदीलगतच्या मोशी, चऱ्होली, दिघी भागात कोरोनाचा प्रभाव कमी झाला नसतानाही असे प्रकार घडत असल्याने धोका वाढला आहे. 

वारकऱ्यांनी कोरोनासारख्या या भयंकर संकटांनाही दिलंय तोंड...

खेड प्रांताधिकाऱ्यांच्या आदेशाने गुरुवारपासून जीवनावश्‍यक वस्तूंबरोबरच इल्कॅट्रॉनिक्‍स आणि अन्य प्रकारची दुकाने उघडण्यास परवानगी दिली आहे. मात्र, मंगल कार्यालयातून लग्न लावण्यास अद्याप पोलिस आणि पालिकेने परवानगी दिली नाही. काही उत्साही मंडळी मात्र चार दिवसांपासून आळंदीत लग्न लावत आहे. वधू- वरांसोबत पंधरा वीस वऱ्हाडी, तर कधी तीन साक्षीदार म्हणून सोबत येतात आणि लग्न लावून जातात. 

आळंदीत आधीच भाजीविक्रेत्यांची मोशी, चऱ्होली, विश्रांतवाडी, येरवडा भागातून आळंदीत धंद्यासाठी गर्दी होऊ लागली आहे. अवैध आणि चोरट्या मार्गाने गांजा आणि दारूची विक्री आहेच. त्यात स्थानिक प्रशासन कारवाई करत नसल्याचे चित्र आहे. आता लग्नकार्ये चोरून करू लागल्याने स्थानिक मंडळींच्या आरोग्याची चिंता वाढली आहे. 

पालिका प्रशासन लॉकडाउन काळात निर्णय घेण्यापूर्वी स्थानिक नगरसेवकांना विचारात घेत नव्हते. भाजी विक्रेते, वाहनांची वर्दळ आणि लग्नकार्यांवर सध्या कोणाचाच अंकुश नाही. लग्न समारंभांमुळे कोरोनाचा फैलाव होऊ शकतो. प्रशासनाने खबरदारी घ्यावी, अन्यथा आळंदीत कोरोनाचा रुग्ण सापडल्यास जबाबदारी संपूर्णपणे प्रशासनाची असेल. 
- वैजयंता उमरगेकर, 
नगराध्यक्ष, आळंदी (ता. खेड) 

स्थानिकांचे विवाह करू शकता. मात्र, आळंदी बाहेरून आलेल्या वऱ्हाडींना परवानगी नाही. मंगल कार्यालये चालविण्यास पालिकेने कोणतीच परवानगी दिलेली नाही. लॉकडाउन असेपर्यंत लग्नकार्ये बंद राहतील. मंगल कार्यालयांना तशी कल्पनाही दिलेली आहे. लग्न चालू असल्याची माहिती दिल्यास लग्न योग्य ती कारवाई केली जाईल. 
- समीर भूमकर, 
मुख्याधिकारी, आळंदी नगरपालिका (ता. खेड)