पुणे - औषधांची ऑनलाइन विक्री थांबविण्यासाठी पुण्यात अन्न व औषध प्रशासनाने (एफडीए) पहिले पाऊल टाकले असून, संबंधित विक्रेत्यांना नोटीस पाठविण्यात येत आहे. दिल्ली उच्च न्यायालयाने औषधांची ऑनलाइन विक्री थांबविण्याचा आदेश दिला आहे. त्यामुळे ही कार्यवाही करण्यात येत असल्याची माहिती पुढे आली आहे.
शहरात ऑनलाइन औषधांची विक्री वाढत आहे. त्यासाठी ॲप्स आणि संकेतस्थळांच्या माध्यमातून घरपोच औषध देणारी व्यवस्था निर्माण झाली. मात्र, या औषधखरेदीत धोका असल्याचे समोर आल्याने दिल्ली उच्च न्यायालयाने ती तातडीने थांबविण्याचा आदेश दिला आहे. या पार्श्‍वभूमीवर ‘एफडीए’च्या पुणे विभागाने औषधांची ऑनलाइन विक्री करणाऱ्या आस्थापनांना नोटीस पाठविली आहे.
याबाबत अधिक माहिती देताना ‘एफडीए’च्या पुणे विभागाचे सहआयुक्त एस. बी. पाटील म्हणाले, ‘‘शहरातील औषधांची ऑनलाइन विक्री बंद करण्याच्या सूचना संबंधित व्यावसायिकांना देण्यात येत आहेत. याबाबत पहिली नोटीस धायरी येथून ऑनलाइन औषधविक्री करणाऱ्या प्लॅनेट फार्मा या आस्थापनेला दिली आहे. या आस्थापनेकडे औषधविक्रीचा परवाना आहे. मात्र, यापुढे त्यांना ऑनलाइन औषधविक्री करता येणार नाही. भविष्यात ऑनलाइन औषधविक्री केल्याचे उघड झाल्यास खटला दाखल करण्यात येईल.’’
नशेची औषधे, गर्भपाताच्या गोळ्या यांची मोठ्या प्रमाणात ऑनलाइन मागणी असल्याचे निरीक्षण औषधविक्रेत्यांच्या संघटनेतर्फे वारंवार नोंदविण्यात आले आहे. सामाजिक आरोग्याच्या दृष्टीनेही अशा प्रकारची औषधांची विक्री होणे धोक्‍याचे असल्याचे मत संघटनेच्या पदाधिकाऱ्यांनी मांडले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.