Pune Crime News : सासूने सोन्याचे दागिने घालू दिले नाहीत; चिडलेल्या सुनेने दिली सुपारी

घरगुती वादातून एका महिलेने आपल्या सासूला मारण्यासाठी गुंड पाठवल्याची घटना पुण्यात घडली आहे. या महिलेला पुणे पोलिसांनी अटक केली आहे. हा प्रकार घरगुती वादातून केल्याचं समोर आलं आहे.

पोलिसांनी दिलेल्या माहितीनुसार, पुण्यातल्या कोंढवा परिसरात दिवसाढवळ्या एका घरामध्ये काही अज्ञात व्यक्ती घुसल्या. त्यांनी या घरातल्या वृद्ध महिलेवर हल्ला केला. त्यांनी तिच्या सोन्याच्या बांगड्या आणि तिच्या सुनेची सोन्याची साखळी पळवली. त्यानंतर या वृद्ध महिलेने पोलिसांत तक्रार दिली.

हेही वाचा - अल्पमतातील निवाडे आणि सामान्य माणूस

त्या तक्रारीनुसार, पोलिसांनी एफआयआर दाख करून घेतला आणि या चोरीप्रकरणी तपासही सुरू केला. त्यानंतर पोलिसांनी सुनेच्या काही स्टेटमेंट्सबद्दल शंका आली. त्यानंतर त्यांनी परिसरातले काही सीसीटीव्ही कॅमेरा तपासले. त्यात घटनेतल्या तीन व्यक्ती दिसल्या. या तीन व्यक्ती कर्नाटकातल्या गुलबर्गा इथल्या असल्याचंही तपासाअंती समोर आलं.

त्यानंतर पोलिसांनी या तिघांनाही अटक केली. कसीम नायकवडी, मेहबूबसाब बरदाजे, अब्दुल मुल्ला अशी या तिघांची नावे आहेत. या तिघांच्या तपासानंतर पोलिसांना आढळून आलं की या तिघांनीही हा गुन्हा सुनेच्या सांगण्यावरुन केला आहे. त्यानंतर पोलिसांनी तिला अटक केली. सासूने सोन्याचे दागिने घालू न दिल्याच्या रागातून सुनेने हे कृत्य केल्याचं पोलिसांनी सांगितलं.