पोलिसांत भांडणाची तक्रार केली, घरी येताना टँकरच्या धडकेत महिलेचा मृत्यू

लोणी काळभोर (पुणे) : लोणीकंदकडून थेऊर फाट्याकडे येणाऱ्या एका इंधन टँकर व रिक्षा यात झालेल्या अपघातात एका 22 वर्षीय महिलेचा जागीच मृत्यू झाला.  दोघेजण किरकोळ जखमी झाले. ही घटना शुक्रवारी (ता. २९ ) रात्री साडेबारा वाजण्याच्या सुमारास थेऊर (ता. हवेली) हद्दीतील थेऊर पावर हाऊस वाशिंग सेंटर येथे घडली. अनिता सुनिल लोंढे (वय- २२ रा. इंदिरानगर, थेऊर, ता. हवेली) असे मृत्युमुखी पडलेल्या महिलेचे नाव आहे. याप्रकरणी अनिता यांचा भाऊ मंदार राजू सकट (वय- २०, रा. इंदिरानगर, थेऊर, ता. हवेली ) यांनी टँकरचालक (नाव व पत्ता माहिती नाही.) यांच्याविरोधात लोणी काळभोर पोलिसात तक्रार दिली आहे. 

- PMC Budget 2021-22 : पुणे महापालिका बजेट ठळक मुद्दे काय आहेत वाचा

पोलिसांनी दिलेल्या माहितीनुसार, मंदार सकट हे मजुरी करतात. शुक्रवारी संध्याकाळी शेजारी राहत असलेल्या कुटुंबातील व्यक्तींशी किरकोळ भांडण झाले होते. त्यांच्याविरोधात तक्रार देण्यासाठी मंदार सकट यांच्याबरोबर आई, चुलती, बहीण अनिता व तिचा तीन वर्षे वयाचा मुलगा व बहीण सुमन असे सर्वजण लोणी काळभोर पोलीस ठाण्यात आले होते. 

पोलीस ठाण्यातील काम झाल्यानंतर परत थेऊर या ठिकाणी जात असताना मंदार सकट, आई , चुलती, बहीण सुमन, व अनिताचा तीन वर्षांचा मुलगा असे एका रिक्षात व अनिताचा मानलेला भाऊ अस्लम हे एका रिक्षात थेऊर या ठिकाणी रात्री बारा वाजण्याच्या सुमारास जाण्यासाठी निघाले. मंदार सकट हे घरी पोहचल्यानंतर त्यांना फोनवरून माहिती मिळाली की थेऊर फाट्यावरील पावर हाऊस वाशिंग सेंटर या ठिकाणी इंधन टँकर व रिक्षा यांचा अपघात झाला आहे. 

- PMC Budget 2021-22 : ​पाचशे इलेक्ट्रीक बस खरेदी करणार
 

दरम्यान, त्या ठिकाणी जाऊन पाहणी केली असता बहीण अनिता लोंढे ही कोणत्याही प्रकारची हालचाल करताना आढळून आली नाही. तिचा जागेवरच मृत्यू झाला होता. तपास लोणी काळभोर पोलीस ठाण्याचे पोलीस उपनिरीक्षक संदीप बोरकर करीत आहेत.