Mount Sudarshan : ‘गिरिप्रेमी’च्या महिला संघाकडून ‘सुदर्शन’ सर

पुणे : माउंट मेरूच्या यशानंतर अवघ्या चारच दिवसांत ‘गिरिप्रेमी’च्या ‘पीक्यूब माऊंट सुदर्शन मोहिमे’च्या महिला संघाने गढवाल हिमालयातील माउंट सुदर्शन या सहा हजार ५२९ मीटर उंच शिखरावर यशस्वी चढाई केली. अशी कामगिरी करणारा हा देशातील पहिलाच संघ ठरला आहे.

मोहिमेचे नेतृत्व करणाऱ्या स्मिता कारीवडेकर यांनी बुधवारी (ता. ६) दुपारी एकच्या सुमारास सुदर्शनचा शिखरमाथा गाठत तेथे देशाचा तिरंगा आणि महाराष्ट्राचा भगवा फडकविला. त्याचबरोबर मोहिमेच्या इतर सदस्या पूर्वा शिंदे- सिंग, पद्मजा धनवी, स्नेहा गुडे आणि स्नेहा तळवटकर यांनीदेखील सहा हजार २०० मीटरपर्यंत मजल मारली,

परंतु हवामान बिघडण्याची शक्यता लक्षात घेता सुरक्षेला प्राधान्य देत त्यांनी शिखरापासून केवळ काही अंतरावरून परतण्याचा निर्णय घेतला. संघातील आणखी एक सदस्य सीमा पै यांनी पाच हजार ५०० मीटरपर्यंत यशस्वी चढाई केली.

या संघाला मोहिमेच्या संयोजनामध्ये तसेच चढाईमध्ये ‘गिरिप्रेमी’चा गिर्यारोहक अखिल काटकर, ‘नेहरू इन्स्टिट्यूट ऑफ माउंटेनियरिंग’चे प्रशिक्षक लाले थाजिल पून, मुनींदर राणा, सौरभ कुमार, तसेच ग्यालबो शेर्पा यांनी मदत केली.

गढवाल हिमालयामध्ये वसलेले माउंट सुदर्शन शिखर हे अतिशय दुर्गम व चढाईसाठी कठीण असणारे शिखर आहे. सतत होणारे भूस्खलन, हिमस्खलन आणि वाटेत असणाऱ्या असंख्य हिमभेगा ही आव्हाने गिर्यारोहकांसमोर कायम असतात. या आव्हानांना तोंड देत, अरुंद कड्यांवरून चढाई करत गिर्यारोहकांना शिखराकडे जावे लागते