भूषण ओक - शेअर बाजार विश्‍लेषक
गेल्या काही वर्षांमध्ये वाहनांमध्ये सॉफ्टवेअर तंत्रज्ञानाचा वापर प्रचंड प्रमाणात वाढला आहे. पूर्णपणे स्वयंचलित वाहने अजूनही विकासावस्थेत असली, तरी आधुनिक गाड्यांमध्ये ३६० अंशांचा दृष्टीटप्पा, ट्रॅफिकबद्दल इशारे, सुरक्षित लेन, इंटरनेट कनेक्टिव्हिटी, पार्किंगसाठी मदत अशा अनेक सोयी उपलब्ध असतात. या सर्वांसाठी अनेक प्रकारचे सेन्सर वापरले जातात, जे सॉफ्टवेअरच्या माध्यमातून वाहनचालकाला माहिती पुरवतात. केपीआयटी टेक्नॉलॉजीज ही ऑटोमोटिव्ह क्षेत्रात जागतिक स्तरावर काम करणारी एक कंपनी आहे, जी वाहनांसाठी सॉफ्टवेअर विकास आणि जोडणीमध्ये विशेषज्ञ आहे. रवी पंडित आणि किशोर पाटील यांनी १९९० मध्ये स्थापन केलेली ही कंपनी आघाडीच्या मोटार उत्पादकांसाठी एक प्रमुख सॉफ्टवेअर भागीदार म्हणून विकसित झाली आहे. युरोप, अमेरिका, जपान, चीन, थायलंड आणि भारतस्थित तीस अभियांत्रिकी केंद्रांसह ही कंपनी जागतिक स्तरावर कार्यरत आहे. रेनॉ आणि होंडा या प्रमुख ग्राहकांसमवेत जगातील अनेक वाहन उत्पादकांना ही कंपनी अप्रत्यक्षरीत्या सेवा पुरवते.