Inflation : महागाईविरुद्धची लढाई संपलेली नाही - शक्तीकांत दास

नवी दिल्ली - सध्या महागाईचा दर कमी झाला असून, आगामी काळात ती ४.७ टक्क्यांपेक्षा कमी होण्याची अपेक्षा असली तरी त्यावर संतुष्ट न होता, महागाईविरुद्धची लढाई सुरूच राहील, असे रिझर्व्ह बँकेचे गव्हर्नर शक्तीकांत दास यांनी आज येथे स्पष्ट केले. भारतीय औद्योगिक महासंघाच्या (सीआयआय) कार्यक्रमात ते बोलत होते.

अन्नधान्याच्या किमती कमी झाल्यामुळे एप्रिलमध्ये किरकोळ महागाई दर १८ महिन्यांच्या नीचांकी पातळीवर आला. यापुढील काळात महागाई दर आणखी कमी नोंदवला जाऊ शकतो, मात्र रिझर्व्ह बँक तेवढ्यावर संतुष्ट राहणार नाही. महागाई कमी करण्याचे प्रयत्न सुरूच राहतील, अशी ग्वाही दास यांनी दिली.

महागाईची दरवाढ आधी सौम्य होती, परंतु अचानक उद्भवलेल्या रशिया-युक्रेन युद्धामुळे परिस्थिती बदलली. जागतिक पुरवठा साखळीत व्यत्यय आला आणि जागतिक पातळीवर वस्तूंच्या किंमती वाढल्या. त्यामुळे महागाई वाढतच गेली. आता परिस्थिती सुधारत आहे. चलनवाढ कमी झाली आहे, ‘जीडीपी’ वाढ कायम आहे आणि चालू खात्यातील तूट आटोक्यात आहे.

भारतीय बँकिंग क्षेत्रासाठी एक मोठे आव्हान असलेली ढोबळ अनुत्पादित मालमत्तेची टक्केवारी कमी होत आहे. बँकांमधील कर्जाची मागणीदेखील १५.५ टक्के झाली आहे, या सगळ्या बाबी सकारात्मक आहेत; तसेच लोकसंख्या हीदेखील भारतासाठी मोठी संधी आहे. या बळावर देशाचा विकासदर चालू आर्थिक वर्षात ६.५ टक्क्यांपर्यंत जाईल, असा विश्वास दास यांनी व्यक्त केला.

अर्थव्यवस्थेच्या वाढीला भू-राजकीय आघाडीवर होणारे बदल, निर्यातीतील मंदी, एल निनो यासारखे धोकेही अडथळे ठरू शकतील, याकडेही त्यांनी लक्ष वेधले. या सगळ्या पार्श्वभूमीवर, आरबीआय सक्रिय, सतर्क राहील आणि देशाची आर्थिक स्थिरता राखण्यासाठी अर्थव्यवस्थेला पाठिंबा देण्यासाठी सर्वतोपरी प्रयत्न करेल, असेही दास यांनी स्पष्ट केले.