Gig Jobs : फेस्टिव्ह सीझनमध्ये गिग जॉब्सचा झगमगाट; सात लाख नोकऱ्या होणार तयार

भारतात सध्या सणासुदीचा काळ सुरू आहे. नवरात्री, दसरा, दिवाळी, नाताळ असे अनेक सण आता डिसेंबरपर्यंत असणार आहेत. या काळात देशातील नागरिक मोठ्या प्रमाणात खरेदी करतात. त्यामुळे ई-कॉमर्स आणि कित्येक दुकानांमध्ये सेल सुरू झाले आहेत. ग्राहकांची मागणी पूर्ण करण्यासाठी कित्येक ठिकाणी तात्पुरत्या स्वरुपाची भरती देखील होत आहे.

आतापर्यंत अशा प्रकारचे तब्बल 4,00,000 गिग जॉब्स तयार झाले असल्याची माहिती बिझनेस स्टँडर्डने दिली आहे. तसंच या सीझनमध्ये असे आणखी तीन लाख जॉब्स तयार होण्याची शक्यता आहे. त्यामुळेच वर्षाअखेरीपर्यंत अशा सात लाख नोकऱ्या तयार होणार असल्याचं सांगण्यात येत आहे.

गेल्या वर्षीच्या तुलनेत भरमसाठ वाढ

2022 सालच्या फेस्टिव्ह सीझनमध्ये डिसेंबरपर्यंत असे 4,00,000 गिग जॉब्स तयार झाले होते. मात्र यावर्षी ऑक्टोबर महिन्यातच हा आकडा गाठला गेला आहे. डिसेंबरपर्यंतचे एकूण अंदाजित आकडे पाहता, यावर्षी गिग जॉब्समध्ये तब्बल 40 टक्क्यांची वाढ होणार असल्याचं मत तज्ज्ञांनी व्यक्त केलं आहे.

ई-कॉमर्स साईट्सचा मोठा वाटा

या वाढीमध्ये ई-कॉमर्स साईट्सचा मोठा वाटा असल्याचं स्पष्ट झालं आहे. उदाहरण द्यायचं झाल्यास एकट्या अमेझॉनने आतापर्यंत भारतात एक लाखांहून अधिक सीझनल नोकऱ्या तयार केल्याचं म्हटलं होतं. यासोबतच फ्लिपकार्टनेही एक लाख नवीन नोकऱ्या तयार केल्याचं स्पष्ट केलं आहे. या दोन्ही कंपन्यांचे मोठे सेल सध्या सुरू आहेत. तसंच दिवाळी अन् नाताळच्या आसपास देखील पुन्हा मोठ्या सेलची घोषणा होण्याची शक्यता आहे.

क्रिकेट वर्ल्ड-कपचा वाटा

यंदा आयसीसी मेन्स क्रिकेट वर्ल्डकप देखील भारतात होत आहे. या माध्यमातून देखील सुमारे एक लाखांहून अधिक गिग जॉब्स तयार झाले आहेत. डिलिव्हरी, ट्रान्सपोर्टेशन, हॉस्पिटॅलिटी आणि इव्हेंट मॅनेजमेंट या क्षेत्रामध्ये नोकऱ्या तयार झाल्या आहेत.