सबस्क्राईब करा
Indias Gold Imports: चांगल्या देशांतर्गत मागणीमुळे 2023-24 या आर्थिक वर्षात देशातील सोन्याची आयात 30 टक्क्यांनी वाढून 45.54 अब्ज डॉलर झाली आहे. शुक्रवारी सरकारी आकडेवारीत ही माहिती देण्यात आली. 2022-23 या आर्थिक वर्षात सोन्याची आयात 35 अब्ज डॉलर इतकी होती. वाणिज्य मंत्रालयाने जारी केलेल्या आकडेवारीनुसार सोन्याची आयात यावर्षी मार्चमध्ये 53.56 टक्क्यांनी घसरून 1.53 अब्ज डॉलर झाली आहे.
स्वित्झर्लंड हा सोन्याच्या आयातीचा सर्वात मोठा स्त्रोत आहे, ज्याचा वाटा सुमारे 40 टक्के आहे. यानंतर आयातीत संयुक्त अरब अमिरातीचा (UAE) वाटा 16 टक्के आणि दक्षिण आफ्रिकेचा वाटा सुमारे 10 टक्के आहे. देशाच्या एकूण आयातीत सोन्याचा वाटा पाच टक्क्यांहून अधिक राहिला आहे. सध्या सोन्यावर 15 टक्के आयात शुल्क आहे.
सोन्याच्या आयातीत वाढ होऊनही, देशाची व्यापार तूट (आयात आणि निर्यातीमधील फरक) गेल्या आर्थिक वर्षात 240.18 अब्ज डॉलरपर्यंत कमी झाली, तर 2022-23 मध्ये ही व्यापार तूट 265 अब्ज डॉलर होती. चीननंतर भारत हा जगातील दुसऱ्या क्रमांकाचा सोन्याचा ग्राहक आहे. ही आयात प्रामुख्याने ज्वेलरी उद्योगाची मागणी पूर्ण करते.
भारतात सोने हा सर्वात सुरक्षित गुंतवणुकीचा पर्याय मानला जातो. पण सोन्याच्या आयातीचा देशाच्या अर्थव्यवस्थेवर मोठा परिणाम होतो. सोन्याच्या आयातीतील वाढीमुळे देशाच्या व्यापार तूटवर परिणाम होतो.
अलीकडच्या काळात सोन्याच्या भावात झपाट्याने वाढ झाली आहे. तो 73,000 रुपये प्रति दहा ग्रॅमच्या वर पोहोचला आहे. अमेरिकेतील बेरोजगारीच्या दाव्यांच्या ताज्या आकडेवारीने श्रमिक बाजारात मंदीचे संकेत दिल्यानंतर सोन्याने वेग पकडला आहे. यामुळे यूएस फेडरल रिझर्व्ह या वर्षी व्याजदरात कपात करण्यास सुरुवात करेल असा विश्वास वाढला आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.