Lakshadweep: मोदी सरकार लक्षद्वीपमध्ये बांधणार नवीन विमानतळ; अरबी समुद्रात भारताचा दबदबा वाढणार

New Airport in Lakshadweep: भारत आणि मालदीवमध्ये सुरू असलेल्या राजकीय वादात आता भारत सरकार मिनिकॉय बेटांवर नवीन विमानतळ बांधणार आहे. येथून लढाऊ विमाने, लष्करी विमाने आणि व्यावसायिक विमाने चालवता येतील अशी योजना आहे. त्यामुळे भारताची लष्करी ताकद वाढेल.

याशिवाय नागरी विमानेही येथे ये-जा करू शकतील. सध्या लक्षद्वीपमध्ये आगती येथे एकच हवाई पट्टी आहे. येथे सर्व प्रकारची विमाने उतरू शकत नाहीत.

या योजनेमुळे नौदल आणि हवाई दलासाठी हिंदी महासागर आणि अरबी समुद्रात ऑपरेशन करणे सोपे होईल. चीनच्या वाढत्या कारवायांना आळा घालणे सोपे होईल. मिनिकॉय बेटावर हवाई पट्टी बांधण्याचा पहिला प्रस्ताव भारतीय तटरक्षक दलाने दिला होता.

सध्याच्या प्रस्तावानुसार, हे नवीन विमानतळ भारतीय हवाई दलाकडून चालवले जाईल. लक्षद्वीपमध्ये नौदल आधीच मजबूत आहे, आता हवाई दल मजबूत होण्याच्या तयारीत आहे.

लक्षद्वीपच्या कावरत्ती बेटावर भारतीय नौदलाचा आयएनएस द्विपरक्षक नौदल तळ आहे. भारतीय नौदल येथे पूर्वीपासूनच मजबूत आहे. मात्र आता हवाई दलाची उपस्थिती आणि ताकद वाढवण्याची तयारी सुरू आहे. कावरत्ती बेटावर नौदल 1980 पासून कार्यरत आहे.

गेल्या आठवड्यात पंतप्रधान नरेंद्र मोदी यांच्या भेटीपासून हा बेट परिसर चर्चेचा आणि आकर्षणाचा केंद्रबिंदू बनला आहे. पंतप्रधान नरेंद्र मोदी यांच्या लक्षद्वीप दौऱ्यानंतर मालदीवच्या मंत्र्यांनी केलेल्या अपमानास्पद टिप्पण्यांवरून निर्माण झालेल्या वादाच्या पार्श्वभूमीवर इस्रायलनेही या बेटांमधील पर्यटनाला चालना देण्यासाठी सहमती दर्शवली आहे.

लक्षद्वीपला पर्यटन स्थळ म्हणून विकसित करण्याच्या प्रकल्पावर काम करण्यास पूर्णपणे तयार असल्याचे इस्रायली दूतावासाने सांगितले.