SEBI : आयपीओमधील गैरप्रकार रोखण्यासाठी ‘सेबी’ सज्ज

मुंबई : प्रारंभिक शेअर विक्री अर्थात ‘आयपीओ’मधील गैरप्रकार आणि चुकीच्या पद्धतीने ‘आयपीओ’साठी अर्ज करण्याच्या प्रकारांचा भांडवल बाजार नियामक ‘सेबी’ तपास करत असून, दोषींवर कारवाई केली जाईल, असे ‘सेबी’च्या अध्यक्षा माधबी पुरी बुच यांनी अलीकडेच ‘असोसिएशन ऑफ इन्व्हेस्टमेंट बँकर्स ऑफ इंडिया’च्या अधिवेशनात सांगितले.

सध्या यासंबंधी तीन प्रकरणांचा तपास सुरू असल्याचेही त्या म्हणाल्या.नव्या कंपन्यांच्या प्रारंभिक शेअर विक्री प्रक्रियेचे व्यवस्थापन हाताळणाऱ्या तीन मर्चंट बँकरकडून ‘आयपीओ’दरम्यान वारंवार कृत्रिमरीत्या मागणी फुगवली जात असल्याचे ‘सेबी’ला आढळून आले आहे. त्यांच्याविरुद्ध कारवाई करण्याचे स्पष्ट संकेत यावेळी बुच यांनी दिले.

त्रयस्थ व्यक्तीच्या कागदपत्रांचा वापर करून बनावट खाती उघडून त्याद्वारे ‘आयपीओ’साठी अर्ज केले जाण्याचे गैरप्रकार आढळले असून, त्यासंदर्भात पुरेशी माहिती आणि सप्रमाण पुरावेदेखील मिळाल्याचे बूच यांनी स्पष्ट केले. शेअर बाजारात सूक्ष्म, लघू आणि मध्यम श्रेणीतील अर्थात एसएमई कंपन्यांच्या नोंदणीसाठी वेगळा मंच आहे.

त्याची नोंदणी प्रक्रियादेखील वेगळी आहे. छोट्या गुंतवणूकदारांचे नुकसान होऊ नये म्हणून अधिक जोखीम घेऊ इच्छिणाऱ्या गुंतवणूकदारांसाठी या मंचावर विशेष तरतूद आहे. याआधी देखील ‘सेबी’ने एसएमई मंचावर नोंदणीबद्ध होणाऱ्या कंपन्यांच्या शेअरच्या भावात होणारा गैरप्रकार आणि हेराफेरी रोखण्यासाठी विशेष देखरेखीची तरतूद केली आहे.