'मॅडमजी मै जिंदा कैसे रहू?' दिग्गज गुंतवणूकदाराने गाणे गाऊन अर्थमंत्र्यांकडे केली मोठी मागणी

Taxes on Capital Gains: अर्थमंत्री निर्मला सीतारामन यांनी 23 जुलै रोजी संसदेत अर्थसंकल्प सादर केला. या अर्थसंकल्पात त्यांनी इक्विटी आणि डेट इन्स्ट्रुमेंट्समधील भांडवली नफ्यावर कर वाढवण्याची घोषणा केली. सरकारने अर्थसंकल्पात अल्पकालीन भांडवली नफा कर 15 टक्क्यांवरून 20 टक्के केला होता.

दीर्घकालीन भांडवली नफा कर 10 टक्क्यांवरून 12.5 टक्के करण्याचा प्रस्ताव होता. या बदलानंतर गुंतवणूकदार निराश झाले आहेत आणि त्याचा परिणाम शेअर बाजारावरही दिसून आला. अनेक गुंतवणूकदार अजूनही सरकारला या निर्णयाचा पुनर्विचार करण्यास सांगत आहेत.

विजय केडिया यांनी गाणे गाऊन अर्थमंत्र्यांकडे मोठी मागणी

देशातील आघाडीच्या गुंतवणूकदारांपैकी एक असलेल्या विजय केडिया यांनी अर्थमंत्री निर्मला सीतारामन यांच्याकडे गाणे गाऊन तक्रार केली आहे. त्यांच्या अधिकृत सोशल मीडिया प्लॅटफॉर्म X वर एक व्हिडिओ शेअर करत विजय केडिया यांनी अर्थमंत्री निर्मला सीतारामन यांच्यासाठी 'एफएम जी एफएम जी, इतना कर में कैसे भरू' नावाचे गाणे शेअर केले आहे.

दिग्गज गुंतवणूकदार विजय केडिया यांचे टॅक्सवरील हे गाणे सोशल मीडियावर व्हायरल झाले आहे. या गाण्याच्या माध्यमातून त्यांनी सरकारला एक संदेश देण्याचा प्रयत्न केला आहे की, बाजारातून पैसे कमवणे सोपे नाही.

यामध्ये अनेक प्रकारचे धोके आहेत, ज्यामुळे गुंतवणूकदारांची बीपी आणि शुगर वाढते. अशा परिस्थितीत या उत्पन्नावरील कर वाढवण्यापूर्वी सरकारने लक्ष देण्याची गरज आहे.

सोशल मीडियावर कौतुकाचा वर्षाव

विजय केडिया यांचे हे गाणे सोशल मीडियावर व्हायरल झाले असून लोक शेअर करत आहेत. अनेक युजर त्यांच्या आवाजाची प्रशंसा करत आहेत आणि लिहित आहेत की या गाण्याद्वारे ते एआर रहमानला टक्कर देत आहेत. काही युजर सरकारला त्यांच्या मागणीकडे लक्ष देण्याची आणि भांडवली नफ्यावर कर वाढवण्याचा निर्णय मागे घेण्याची विनंती करत आहेत.

भांडवली नफा कर म्हणजे काय? (कॅपिटल गेन टॅक्स)

भांडवलापासून मिळणाऱ्या नफ्यावर लावलेल्या कराला भांडवली नफा कर म्हणतात. अल्पकालीन भांडवली नफा कर आणि दीर्घकालीन भांडवली नफा कर असे दोन प्रकार आहेत.

अल्प मुदतीच्या भांडवली नफ्यावर 15 टक्के आणि दीर्घकालीन भांडवली नफ्यावर 10 टक्के कर आकारला जातो. 1 लाख रुपयांपर्यंतच्या वार्षिक भांडवली नफ्यावर कोणतेही कर दायित्व नाही.