Stock Market : गुंतवणूकदारांमध्ये आनंदाचे वातावरण!

आज 7 एप्रिल 2025 रोजी भारतीय शेअर बाजार उघडला तोच मुळी सुमारे 4 टक्के खालच्या पातळीवर. अमेरिकन राष्ट्राध्यक्ष श्री. डोनाल्ड ट्रम्प यांनी काही कडक टॅरिफ धोरणांची घोषणा केल्यामुळे जागतिक बाजारांमध्ये ट्रेड वॉर सुरू होण्याची भीती निर्माण झाली आणि जगभरातील शेअर बाजार खाली आले..सामान्यतः जेव्हा बाजार असे खाली पडतात, तेव्हा "गुंतवणूकदारांचे अमुक लाख करोड रुपये बुडाले!" किंवा "शेअर बाजारामध्ये हाहा:कार" अश्या शीर्षकाचे लेख प्रकाशित होतात. परंतु आज मी "गुंतवणूकदारांमध्ये आनंदाचे वातावरण" अश्या शीर्षकाचा लेख लिहीत आहे. असा लेख लिहिण्याची माझी फार काळापासून इच्छा होती, परंतु संधीच मिळत नव्हती.."गुंतवणूकदारांचे पैसे बुडाले" असा लेख जेव्हा जेव्हा वाचनात येतो तेव्हा तेव्हा बाणेदारपणे त्या लेखकाला मेसेज करून "तुम्ही लिहिलेले चुकीचे आहे" हे सांगण्याची उर्मी नेहमी माझ्या मनामध्ये दाटून येते. अर्थात मी असे काही करीत नाही. पण आज या लेखाच्या माध्यमातून माझा विचार तुमच्यासमोर मांडत आहे. गुंतवणूकदारांमध्ये आनंदाचे वातावरण निर्माण होण्याचे कारण एकच आहे, ते म्हणजे - ही संधी आहे!.बाजार जेव्हा खाली पडतो तेव्हा आपल्याला ते नुकसान आहे असे वाटते. परंतु नीट विचार केल्यास आपल्याला हे लक्षात येईल की हे नुकसान नसून ही एक सुवर्णसंधी आहे. नीट समजून घेण्याचा प्रयत्न करा. दररोज आपल्याला शेअर्सच्या ज्या किमती दिसतात त्या "नोशनल" असतात. एखादया शेअरचे उदाहरण बघा, खरेदीदार म्हणतो मला 99 रुपयांना शेअर हवा आहे, आणि विक्रेता म्हणतो हाच शेअर मला 100 रुपयांना विकायचा आहे. .खरेदीदार आणि विक्रेता या दोघांच्या सामंजस्याने जो भाव ठरेल तो भाव म्हणजे त्या शेअरची तेव्हाची किंमत असते. ही किंमत सतत बदलत असते. केवळ दोन लोकांनी आपापसात एखाद्या वस्तूचा व्यवहार एका विवक्षित रकमेमध्ये केला म्हणून त्या वस्तूची खरी किंमत ठरत नसते. वस्तूची खरी किंमत ठरते ती तिच्या क्वालिटीनुसार! शेअर बाजारामध्ये रोजच्या रोज व्यवहार करणारे लोक मोह आणि भीती या भावनांचे गुलाम असतात..जेव्हा एखादी चांगली बातमी येते तेव्हा मोहापोटी लोक जास्त भावात शेअर खरेदी करतात आणि जेव्हा एखादी वाईट बातमी येते तेव्हा भीतीपोटी लोक कमी भावामध्ये शेअर्स विकून टाकतात. सध्याचे साधे उदाहरण बघा - सध्याची भीती ही अमेरिकन राष्ट्राधक्षांनी लादलेल्या टॅरिफ्समुळे निर्माण झालेली भीती आहे. भारतामधून अमेरिकेमध्ये जो एक्स्पोर्ट होतो त्यावर या टॅरिफ्सचा परिणाम होईल असे लोकांना वाटत आहे. आता यामध्ये विचार करण्यासारख्या दोन गोष्टी आहेत - पहिली गोष्ट म्हणजे या टॅरिफ्सचा परिणाम काही निवडक कंपन्यांवर होऊ शकेल, सरसकट सर्व कंपन्यांवर नाही. ट्रम्प यांनी टॅरिफ लादले म्हणून भारतीय लोक दात घासायचे थांबवणार नाहीत, औषधे घ्यायचे थांबवणार नाहीत, एकमेकांना फोन करायचे थांबवणार नाहीत. इन्स्टाग्रामवर रील बघणे थांबवणार नाहीत, सिगारेटी ओढणे थांबवणार नाहीत, दारू पिणे कमी करणार नाहीत, गाड्या घेणे कमी करणार नाहीत. .इन्फ्रास्ट्रक्चरची मागणी मोठीच राहणार, लोकांना राहण्याकरिता घरे लागणारच. लोक बॅंकाकडून कर्जे घेणारच, इन्श्युरन्स प्रिमियम भरणारच. असे अनेक अनेक व्यवसाय आहेत जे भारतामध्ये कायम डिमांडमध्ये राहणार आणि मोठा नफा कमावणार! भारतामध्ये आज सर्वात मोठी तरूण लोकसंख्या आहे. ही सर्व लोकसंख्या उपभोगवादी आहे. त्यामुळे आपल्या देशामध्ये कोणत्याच प्रकराची आर्थिक मंदी नजिकच्या काही वर्षात येईल अशी परिस्थिती मला तरी दिसत नाही. आणि दुसरी गोष्ट म्हणजे समजा या टॅरिफ्सचा आणि ट्रेड वॉरचा परिणाम झालाच तर हा परिणाम प्रत्यक्षात दिसण्याकरिता किमान तीन महिन्यांचा काळ लागेल. आत्ता एप्रिल महिना चालू आहे. या पहिल्या तिमाहीचे निकाल येण्याकरिता जुलै महिना उजाडेल. मग आत्ता बाजार खाली पडायचे काय कारण? तर भीती ही भावना! भावनेच्या भरात माणसे कायम आततायी निर्णय घेतात तेच सध्या होत आहे..गेल्या पाच वर्षांपासून भारतीय शेअर बाजार सातत्याने वरच जात होता. यात रिटेल गुंतवणूकदारांच्या वाढत्या सहभागाचा मोठा वाटा होता. अशा काळात खर्या गुंतवणूकदारांच्या मनामध्ये एकच प्रश्न होता - खरेदी करायची तरी कधी? बघावे तेव्हा बाजार नवनविन उच्चांक गाठतच होता, आणि खरेदीकरिता योग्य पातळी सापडतच नव्हती. याच सर्व गुंतवणूकदारांकरिता सध्याचा काळ हा अतिशय आनंददायक आहे. ज्या कंपन्यांवर आपला विश्वास आहे, ज्या कंपन्या चांगल्या आहेत, त्यातल्या जवळपास सगळ्या कंपन्यांचे शेअर्स सध्या प्रचंड मोठ्या सवलतीमध्ये उपलब्ध आहेत. विचार करा - एखाद्या चांगल्या ब्रँडचा तुम्हाला खूप आवडणारा टी-शर्ट जर 40% डिस्काऊंटमध्ये मिळत असेल, तर तुम्ही खुश होता की दुःखी? मग हेच तत्त्व आपण शेअर बाजारासाठी का लागू करीत नाही? बाजार वर गेला की गुंतवणूकदारांचा फायदा होतो आणि बाजार खाली गेला की गुंतवणूकदारांचे पैसे बुडतात हे नॅरेटिव्हच अर्धवट आहे असे मला वाटते..फायदा होण्याकरिता "बाजार वर जाणे" या घटनेसोबत "अश्या तेजीच्या वेळी हातात मोठ्या प्रमाणात शेअर्स असणे" ही घटनादेखील अत्यंत आवश्यक आहे. नुसता बाजार वर गेला पण डीमॅट खात्यामध्ये फक्त पाच पन्नास शेअर असतील तर त्या तेजीचा काय उपयोग? जेव्हा बाजार वर जाईल तेव्हा हाताशी भरपूर शेअर्स असणे आवश्यक आहे आणि ते शेअर्स गोळा करण्यासाठी डोनाल्ड ट्रम्पसारखी माणसे आणि बातम्या देवदूत बनून येत असतात. सध्याच्या या पडझडीच्या निमित्ताने आपण आपला दृष्टीकोन बदलण्याची गरज आहे. बाजारातील प्रत्येक घसरण ही एक संधी असते. योग्य अभ्यास, मजबूत कंपन्यांची निवड, आणि दीर्घकालीन दृष्टी ठेवून अश्या पडझडीच्या काळामध्ये गुंतवणूक केली, तरच आपली संपत्ती निर्माण होत असते. गुंतवणुकीच्या प्रवासात शांतता, संयम, आणि स्पष्ट विचार आवश्यक असतो. आणि हे तीनही गुण अशा काळातच विकसित होतात, जेव्हा बाजार इतरांना घाबरवत असतो..Israel UK Tensions : ब्रिटनचे दोन खासदार इस्राईलच्या ताब्यात.आजचा बाजार आपल्याला विचारतो आहे - "भीतीने पळणार की संधी शोधणार?" या प्रश्नाचे योग्य उत्तर तुम्हाला शोधायचे आहे. हा शेअर मार्केटच्या परीक्षेमधला शंभर मार्कांचा प्रश्न आहे, ऑप्शनला टाकू नका! :-)- नीरज बोरगांवकर.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Stock Market : गुंतवणूकदारांमध्ये आनंदाचे वातावरण!

Related Stories