Politics of Blind Faith: The Unholy Alliance Between Corrupt Leaders and Fake Godmen
Sakal
व्यर्थ ज्ञानेश्वर । व्यर्थ झाला तुका ।
एका झाला मुका । वाचा गेली ॥
व्यर्थ गाडगेबाबा । व्यर्थ तुकडोजी ।
फुकाचे गुरुजी । ठरले आता ॥
शिकविले यांणी । तुम्हा आम्हां सारे ।
विचारांचे वारे । घुमविले ॥
आंधळ्या श्रध्देचे । झाले निर्मूलन ।
विज्ञान विज्ञान । गजर हो झाला ॥
ज्ञानाचे पवन । वाहिले वाहिले ।
इकडुनि आले । तिकडे गेले ॥
पुरोगामी झाला । अमुचा महाराष्ट्र ।
आणि धष्टपुष्ट । विकासाने ॥
सारे काही आता । उलटे पालटे ।
संताची सालटे । निघती देखा ॥
खड्ड्यामाजी गेली । संतांची वचने ।
नेत्यांची भाषणे । मतांलागी ॥
तोचि गा पारधी । ज्याच्या हाती ससा ।
करा खाली खिसा । बाकीच्यांनी ॥
दुनिया कसली । वेड्यांचा बाजार ।
जिथे होते ठार । विवेकबुध्दी ॥