पुण्यातील स्वारगेट एसटी बसस्थानकात तरुणीवर झालेल्या लैंगिक अत्याचाराच्या घटनेने एकूणच व्यवस्थेचे ‘वस्त्रहरण’ झाले आहे. ‘महिलांच्या सुरक्षेस सर्वोच्च प्राधान्य दिले जाईल’, असे राज्यकर्त्यांकडून सातत्याने सांगितले जाते. मात्र, महिलांवरील अत्याचारांचा आलेख वाढत चालला आहे. शहरातील गुन्हेगारी आणि महिलांवरील अत्याचार रोखण्यासाठी आता घोषणाबाजी न करता प्रत्यक्ष कृतीची वेळ आली आहे. शहरात मोकाट फिरणाऱ्या सराईत गुन्हेगाराकडून तरुणीवर लैंगिक अत्याचाराची घटना घडली. या घटनेने पुणे पोलिसांची लक्तरे वेशीवर टांगली गेली आहेत.