अग्रलेख : गड गेला; पण वाघ राहिला

भारतीय जनता पक्षाने बहुतांश महापालिका जिंकत सर्वत्र ‘केसरिया’ फडकवला आहे. गेल्या तीन दशकांहून अधिक काळ मुंबईनगरीवर असलेले ठाकरे ब्रँडचे अधिराज्य महापालिका निवडणुकीत खालसा झाले. अनेक अर्थांनी ही निवडणूक ऐतिहासिक म्हटली पाहिजे. स्थानिक निवडणुका असल्याने गणितेही बव्हंशी स्थानिक होती, समीकरणांची मोडतोडही मतांचा हिशेब करुन केली गेली, तरीही भाजपने त्यातही पुन्हा सरशी साधली हे मान्य करायलाच हवे. निव्वळ मोडतोडीच्या राजकारणाच्या पलीकडे जाऊन झालेल्या विकासकामांचे प्रत्यक्ष नमुने दाखवण्यातही भाजपची प्रचारयंत्रणा कमी पडली नाही. मतदारांपर्यंत शेवटपर्यंत संपर्क ठेवणारा पक्षच अखेर यश मिळवतो. त्यामुळे मुख्यमंत्री देवेंद्र फडणवीस यांच्या नेतृत्वाबरोबरच भाजपच्या कार्यकर्त्यांना या विजयाचे श्रेय द्यायला हवे.