हौस ऑफ बांबू : नमन नटवरा विस्मयकारा..!

हौस ऑफ बांबू नअस्कार! मला वेध लागले आहेत…संगीत मानापमानाचे. नाटक नव्हे, चित्रपट! आज नारायणराव बालगंधर्व असते तर प्रिमियरला त्यांनी पडद्यावर अत्तर शिंपडले असते. खुर्च्यांच्या हातात अत्तराचे फाये कोंबून ठेवले असते नि जाईजुईचे गजरे वाटले असते. मायबाप प्रेक्षकांच्या स्वागताला स्वत: उभे राहिले असते. .मायबाप प्रेक्षकांचं काय सांगू देवा! तेव्हाचे प्रेक्षक असते तर शालूशेले लेऊन, बालगंधर्व फ्याशनची केशभूषा करुन स्त्रिया खेळाला गेल्या असत्या. पुरुष मंडळींनी ठेवणीतला कोट काढून बाहीत रेशमी रुमाल दडवला असता. पगडीचा कोन साधला असता.येवढं करुन शेवटी बालगंधर्वाचं गारुड सकौतुक करुन घेतलं असतं. पुन्हा एकदा अशीच संधी आली आहे. मराठी चित्रपटांचं सुवर्णयुग कधी येणार, याची वाट बघत न बसता आमच्या सुबोध भावेंनी ‘सं. मानापमान’ रुपेरी पडद्यावरच आणलंय. ओरिजिनल मानापमानात छत्तीस गाणी होती (म्हणे) तरीही सुबोधनं चौदा गाणी ठेवली आहेत..कृष्णाजी प्रभाकर खाडिलकर हे टिळकपंथी पत्रकार, संपादक, लेखक आणि प्रतिभावान नाटककार. मराठी रंगभूमीवर सुवर्णयुग आणणारी नाटकं त्यांनी लिहिली. ‘सं. मानापमान’ हे त्यापैकी एक.या नाटकानं असंख्य चढउतार बघितले. या नाटकाचे खरेखोटे किस्से सांगणारी पिढीही काळाच्या पडद्याआड एग्झिट घेती झाली आहे. उरले आहेत ते स्मरणांचे मोती. भूतकाळसुद्धा ‘मी पुन्हा येईन’ असं म्हणेल का? सुबोध भावेच्या कानात तो म्हणाला म्हणे!सुबोध भावे! अहाहा!! मराठी चित्रपटसृष्टीला दुपारी एक ते चार या वेळेत पडलेलं एक सुंदरसं स्वप्न!!.…पोटात ‘श्रेयस’ची थाळी (अळुची भाजी इन्क्लुडेड) चेपलेली असावी. आढ्याला पंखा फिरता असावा, हवेत पुणेरी गारवा असावा, मुखात अनिल पानवाल्याकडलं मसाला पान असावं आणि मिटल्या डोळ्यांसमोर एक तेज:पुंज पुणेरी सितारा यावा, तो म्हणजे सुबोध भावे!!लोक ‘मत करो, मत करो’ असं म्हणत होते, तरी त्यानं ‘कट्यार’ काळजात घुसवलीच. त्यात पंडितजींचा रोल शंकर महादेवनशास्त्रींना दिला. सचिन पिळगावकर हे एरवीच उत्सुक अभिनेते. त्यांच्याकरवी त्यानं या भवनातील गीत पुराणे पुन्हा एकदा आळवलं..ढिंग टांग : गडचिरोलीचा गडगडाट..!.त्या आधी बालगंधर्वांचं बायोपिक त्यानंच केलं, आणि त्याच्याही आधी ‘अरे हा तर बालगंधर्व’ असं म्हणणाऱ्या लोकमान्यांचाही चरित्रपट केला. ही सौंदर्यलेणी नव्या पिढीलाही समजली पाहिजेत, या हट्टानं सुबोध भावे अगदी मशालीसारखे पेटले आहेत…१२ मार्च १९११ रोजी रिपन थेटरात ‘सं. मानापमान’चा पहिला खेळ झाला. याच खेळानंतर पुढे बालगंधर्वांच्या कवतिकाचा काळ अवतरला. त्यांच्या भामिनीनं जे काही गारुड केलं, ते उतरलंच नाही, देवा. धैर्यधराचा पार्ट साक्षात मा. दीनानाथांनी केला होता..दीनानाथांची तिलककामोदातील पदातली ‘रवी मीऽऽ..’ ही तान गेली की नाट्यगृहाचे तारांगण होऊन जायचे म्हणे. बालगंधर्वाचे ‘नाही मी बोलत’ मधले सुरेल कृतक कटाक्ष रसिकमनांना भुरळ घालायचे. संगीतसूर्य केशवराव भोसले यांनी धैर्यधराच्याच भूमिकेत संयुक्त मानापमानाच्या खेळात ‘चंद्रिका ही जणू’ सुरु केली, तेव्हा भुईवर अक्षरश: चांदणे सांडले म्हणतात…‘मानापमान -द मूव्ही’मध्ये हे सुवर्णक्षण दिसतील. शंकर-अहसान-लॉय या स्वरत्रयीनं ‘सं. मानापमान’चं संगीत दिलंय. आता त्यांनी कुठलं संगीत दिलंय, आणि गोविंदराव टेंब्यांनी कुठलं दिलंय, ते बघावं लागेल.पुन्हा एकदा ती रंगमंचीय जादू दाखवण्याचा खटाटोप सुबोध भावे पोटतिडकीनं करताहेत. ‘पुष्पा’च्या (झुकेगा नही..) जमान्यात हे असलं वेडं स्वप्न पाहाणं ग्रेटच.मराठी रसिकांनीही गर्दी करुन रुपेरी पडद्यावरचं हे ‘मानापमान’ आवर्जून पाहायला हवं. आपलं संचित आपण नाही मिरवायचं तर कोणी?.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.