ढिंग टांग
झुंजुमुंजु होऊन बराच वाढुळ वेळ झालावता. (कृषिकथा असल्याने बॅकग्राऊंड ग्रामीण ठेवावी लागणार. तस्मात ही सुरवात. शहरी अडाण्यांसाठी शब्दार्थ : झुंजुमुंजु-पहाट, बराच– बराच. वाढुळ -बराच. झालावता- झाला होता.) महाबळेश्चरच्या निसर्गरम्य खोऱ्यातील दरे नावाच्या येका सुंदरशा गावानजीकचा माळ उन्हानं तापत व्हता. (राहू दे व्हताच.) माळ तापला तरी हिरवाईची झिलई त्यानं आजुनसुदिक सोडली नव्हती. (नव्हतीच ठीक!) दोन कास्तकार शिवारात बांधाबांधानं हिंडत व्हते. येक्यानं खांद्यावं (शहरी अडाण्यासाठी : खांद्यावं म्हंजी खांद्यावर.) लांबसडक पांढरीची काठी आडवी धरली व्हती. दुज्याच्या खांद्यावं कुदळ व्हती. दोघं बी बांधाबांधानं हिंडत व्हते.