पोलिसांवर बेतलेले बरेचसे हिंदी सिनेमे आपल्याला कायम पाहायला मिळतात. त्यात पोलिसांचे उदात्तीकरण बऱ्याच प्रमाणात केलेले असते. मल्याळम व तमिळ सिनेमाकडे गेल्यावर मात्र या गृहितकाला छेद दिल्याचे पाहायला मिळते. वेट्री मारण या दिग्दर्शकाचे कामही याच धर्तीवरील आहे. त्याच्या ‘विसरणाई’ (२०१५) या चित्रपटात पोलिसांची क्रूरता, जातीचे राजकारण हे मुद्दे केंद्रस्थानी होते. हाच दिग्दर्शक ‘विडुदलै’ नावाचा दोन भागांचा चित्रपट समोर घेऊन आला आहे.