ढिंग टांग : नवं सरकार ! | Sakal
sakal

बोलून बातमी शोधा

British Nandi writes about the new government maharashtra politics cm eknath shinde dcm devendra fadanvis cabinet

ढिंग टांग : नवं सरकार !

नवं सरकार आलंय, लोकहो,

नवं सरकार आलंय!

जनतेच्या भल्यासाठी सारं

बैजवार झालंय!

आता सम्दं भलं व्हनार

आता सम्दं खुलं व्हनार

आता सम्द ढिलं व्हनार

इडा टळली, पीडा टळली,

मंगल मंगल झालंय,

नवं सरकार आलंय, लोकहो,

नवं सरकार आलंय!

काय सुरत, काय आसाम,

काय गोवा, काय प्रवास

तत्त्वांसाठी पायपीट होती

लई सहन केला त्रास!

जुलुमशाही गेली लांब

उभा लोकशाहीचा खांब

भिऊ नकोस, जरा थांब!

लोकशाहीसाठीच एवढं सगळं

दादा, करावंच लागतंय,

नवं सरकार आलंय, लोकहो,

नवं सरकार आलंय!

लोकहो, पुढाऱ्याचं जिणं

खडतर असतं फार

लोकांसाठीच त्यांना लागतं

हाटेल फाइव स्टार!

फिरायला खास विमान

मर्सिडिझ गाड्यांची शान

पंचतारांकित लोककल्याण!

उठता बसता गांधींचं नाव

यांच्या मुखी असतंय!

नवं सरकार आलंय, लोकहो,

नवं सरकार आलंय!

एक नेता उठला, आणि

खुर्चीसकट पळाला!

दुसरा नेता उठला, आणि

घरी जाऊन बसला!

कोण आला कुठे?

कोण आडमुठे?

कोण उंच थिटे?

थोडं लोककल्याण, थोडा टाइमपास

असंच गणित असतंय!

नवं सरकार आलंय, लोकहो,

नवं सरकार आलंय!

लोकशाही म्हंजे तुम्हास्नी

पोरखेळ वाटला काय?

खुर्चीसकट पळाले नेते

ही काय जोक नाय!

खरं असतं संख्याबळ

खरं असतं मतांचं बळ

खरं असतं अश्रूंचं बळ

कुणाचं खरं, कुणाचं लबाड

सोयीनं ठरत असतंय!

नवं सरकार आलंय, लोकहो,

नवं सरकार आलंय!

तुमचं नाही, आमचं नाही,

सारं जन्तेसाठी

स्वार्थासाठी काही नाही,

सारं लोकांसाठी!

तुमचं आमचं कल्याण व्हणार,

हे तर नक्की झालंय!

नवं सरकार आलंय, लोकहो,

नवं सरकार आलंय!

नव्या सरकारचं आता लोकहो,

जोरात स्वागत करा!

फोडा फटाकं, भुईनळ्या

अन वाजवा ढोल नगारा

कोपरापासून जोडा हात

होऊंजाऊ द्या रुजवात

मगच बनेल पक्की बात

कुणाचं काईबी चालू द्या, राव,

आपण तर जन्ता असतोय!

नवं सरकार आलंय, लोकहो,

नवं सरकार आलंय!

Web Title: British Nandi Writes About The New Government Maharashtra Politics Cm Eknath Shinde Dcm Devendra Fadanvis Cabinet

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top