अमेरिकेची २१ वर्षीय युवा खेळाडू कोको गॉफ हिने अव्वल मानांकित अरीना सबलेंका हिचा संघर्ष तीन सेटमध्ये परतवून लावला आणि पहिल्यांदाच फ्रेंच ओपन या लाल मातीवरील ग्रँडस्लॅम विजेतेपदाला गवसणी घातली. गॉफच्या या देदीप्यमान कामगिरीनंतर सेरेना विल्यम्स हिचे माजी प्रशिक्षक पॅट्रिक माऊराटोग्लोयू यांंनी कौतुक केले. महिला टेनिसमधील एकमेव सुपरस्टार खेळाडू म्हणून तिचा उल्लेख केला. पॅट्रिक यांच्या ‘बोल्ड’ वक्तव्यानंतर स्तुती व टीका अशा दोन्ही प्रकारे प्रतिक्रिया उमटू लागल्या. सध्याच्या घडीला गॉफ हिच्याकडून सुवर्ण भविष्याची अपेक्षा केली जात आहे.