Coupe Car: Style and Performance
esakal
चारचाकी म्हटलं की डोळ्यासमोर चार दरवाजे असणारी मोटार येते. ती प्रशस्त जागा आणि कुटुंबाला एकत्रित प्रवास करण्याची सुविधा देते. मात्र या संकल्पनेला छेद देणारी कुपे श्रेणीची मोटार ही दूरचा प्रवास सुसह्य तर करतेच पण समृद्ध करणारा अनुभवही देते. आकाराने कॉम्पॅक्ट असणारी कुपे ही वाहनांच्या गर्दीतही लक्ष वेधून घेते. कुपे ही स्टाइल, स्टेटस आणि तंत्रज्ञानाचं परफेक्ट कॉम्बिनेशन आहे. पण तिची किंमत आवाक्यात का नाही? याचे उत्तर वैशिष्ट्यपूर्ण कामगिरी, उच्च प्रतीचे इंजिनिअरिंग आणि उत्पादनाच्या अत्याधुनिक तंत्रज्ञानात दडलेले आहे.
वाहन जगतातील विविध मोटारीच्या बॉडी-स्टाइल्समध्ये कुपे (Coupe) हा प्रकार विशेष लक्ष वेधून घेणारा आहे. आकर्षक डिझाइन, उच्च कामगिरी क्षमता आणि स्पोर्टी ड्रायव्हिंग अनुभव यासाठी कुपे मोटार ओळखली जाते. जगभरात स्पोर्ट्स आणि प्रीमियम सेगमेंटमध्ये कुपेचा महत्त्वपूर्ण वाटा आहे. कुपे हा मोटार बॉडी-स्टाइलचा प्रकार आहे. यात साधारणतः दोन दरवाजे आणि स्लोपिंग रूफलाइन (मागील भाग उतार असलेले छत) असते. या मोटारीचा उद्देश साधेपणा किंवा जास्त जागा न देता स्टाइल, वेग आणि ड्रायव्हिंगचा आनंद देणे हा असतो. काही आधुनिक मॉडेल्समध्ये चार दरवाजे असले तरी त्यांची रचना स्पोर्टी असल्याने त्याही कुपे म्हणून ओळखल्या जातात. ज्यांना ड्रायव्हिंगचा थरारक अनुभव, आकर्षक लूक आणि वैयक्तिक वाहनाची शैली महत्त्वाची वाटते, त्यांच्यासाठी कुपे हा सर्वोत्तम पर्याय ठरतो. हा वाहन प्रकार व्यावहारिकतेपेक्षा अनुभव आणि शैली यावर अधिक भर देतो.