गलितगात्र मोहरे!

गुणवत्ता आणि क्षमतेची कवचकुंडले असली तरी शेवटी सर्व खेळ आकडेवारीचा असतो. ऐन परीक्षेत तुम्ही कच खाल्ली तर अंगी असलेल्या हुशारीचा काहीच फायदा नसतो, शेवटी प्रगतिपुस्तकावरील लाल शेराच तुमची पायरी सिद्ध करतो. हेच भारतीय क्रिकेट टीममधील काही मोहऱ्यांबाबत लागू होते. .साई सुदर्शन आणि प्रसिध कृष्णा आयपीएलमध्ये डरकाळी फोडणाऱ्या या दोघांनी देशासाठी प्रतिष्ठा पणास लागते तेथे अर्थात इग्लंडविरुद्धच्या पहिल्या कसोटी सामन्यात म्यॅव म्यॅव केले. ही दोन प्रातिनिधिक उदाहरणे..आयपीएलमध्येसाई सुदर्शन : सर्वाधिक ७५९ धावा आणि ऑरेंज कॅपप्रसिध कृष्णा : सर्वाधिक २५ विकेट आणि पर्पल कॅपइंग्लंडविरुद्ध पहिल्या कसोटीतसाई सुदर्शन : पहिल्या डावात ०, दुसऱ्या डावात ३०प्रसिध कृष्णा : पहिल्या डावात २०-०-१३८-३ (षटकामागे ६.४० सरासरीने धावा). दुसऱ्या डावात १५-०-९२-२ (षटकामागे ६.१३ सरासरीने धावा)आयपीएलच्या कामगिरीला प्राधान्य देण्यात येत नाही, असे सांगितले जात असले तरी झुकते माप मात्र निश्चितच दिले जाते हा आजवरचा अनुभव..आता रिषभ पंतचे उदाहरण...आयपीएलमध्ये पूर्णतः अपयशी (शेवटच्या सामन्यात मात्र शतक हा अपवाद).इंग्लंडविरुद्ध पहिल्या कसोटीत दोन्ही डावात दिमाखदार शतके करण्याचा विक्रम.वरील दोघांवर चमकलेला आयपीएलचा रंग उडाला तर रिषभ पंतने आयपीएल आणि आंतरराष्ट्रीय क्रिकेट, प्रामुख्याने कसोटी क्रिकेट कितीतरी पटीने वेगळे आहे, हे सिद्ध केले.गुणवत्ता आणि क्षमतेची कवचकुंडले असली तरी शेवटी सर्व खेळ आकडेवारीचा असतो. ऐन परीक्षेत तुम्ही कच खाल्ली तर अंगी असलेल्या हुशारीचा काहीच फायदा नसतो, शेवटी प्रगती पुस्तकावरील लाल शेराच तुमची पायरी सिद्ध करतो. एकच कसोटी सामना झालाय, मग एवढा अविश्वास आणि टीका कशाला, असा प्रश्न कोणाच्याही मनात येऊ शकतो, काही अंशी ते खरेही असेल; पण.आयपीएलमध्ये कितीही नाव कमावले तरी खरी ओळख ही देशाचे प्रतिनिधित्व करताना मिळत असते. हार-जीत हा खेळाचा भाग असला तरी तुम्ही कसा खेळ केला, किती लढाऊ बाणादाखवला आणि चुकांतून किती बोध घेत सुधारणा केली यावर मूल्यांकन होत असते. साईसुदर्शनने किती धावा केल्या यापेक्षा तो कसा बाद झाला, कारण त्याचे पूर्ण दोष इंग्लंडने उघडे पाडले. प्रसिध कृष्णाने किती विकेट मिळवल्या, यापेक्षा त्याची सरासरी षटकामागे सहा धावांची होती. म्हणजे तो कसोटी खेळत होता की मर्यादित षटकांचे सामने, असा प्रश्न उपस्थित होतो..रोहित शर्मा आणि विराट कोहली यांच्या निवृत्तीनंतर रिकाम्या झालेल्या जागेवर साई सुदर्शन आणि देशांतर्गत स्पर्धांत अक्षरशः खोऱ्याने धावा करणाऱ्या करुण नायर यांची निवड झाली. तर मोहम्मद शमी पूर्ण तंदुरुस्त नसल्यामुळे त्याच्या ठिकाणी प्रसिध कृष्णाला अंतिम संघात स्थान मिळाले. त्यामुळे खरं तर या तिघांवरची जबाबदारी वाढते. मग अशा वेळी १०० टक्क्यांपेक्षा अधिक जिद्द अपेक्षित होती. आता सविस्तरपणे विश्लेषण केल्यावर या टीकेची धार लक्षात येईल..टी-२० प्रकारात लेग साइडला यष्टीच्या बाहेर टाकलेले चेंडू वाईड ठरतात. त्यामुळे त्या टप्प्यावर चेंडू टाकणे म्हणजे पायावर धोंडा मारून घेण्यासारखेच. आयपीएलमध्ये साई सुदर्शन बाद होत नव्हता, कारण यष्टींच्या दिशेत आलेले चेंडू तो सफाईदारपणे मारत होता आणि धावांचा पाऊस पाडत होता. कसोटी संघातील त्याचे स्थान निश्चित होत होते. तेथे सातासमुद्रापार इंग्लंड संघाचे व्यवस्थापन साई सुदर्शनची कमकुवत बाजू हेरली होती. साईला त्याची कल्पनाही नसावी. लीड्स येथे पहिली कसोटी सुरू झाली. .९१ धावांच्या सलामीनंतर साई सुदर्शन फलंदाजीस आला आणि लगेचच लेग स्लिपला क्षेत्ररक्षक उभा करण्यात आला. बरं हे त्याचे कसोटी पदार्पण होते, त्यामुळे त्याचे दोष माहीत नसावे; पण इंग्लंडने ते कधीच टिपले होते. साधारणतः पूर्ण दोष माहीत नसल्याशिवाय लेगस्लीप उभी केली जात नसते. पारंपरिक क्षेत्ररक्षणावर भर असतो; पण साई सुदर्शनसाठी तो सापळा होता. बेन स्टोक्सने नेम धरून टाकावे, असे डाव्या यष्टीबाहेर चेंडू टाकले. त्यातील एक चेंडू पॅडला लागून लेग स्लीपकडे गेला. एवढे होऊनही साई सुदर्शन सुधारला नाही. डाव्या यष्टीबाहेरील एक चेंडू तो खेळला आणि लेगस्लिपकडे झेल देऊन बाद झाला. हाच होता त्याच्यासाठी सापळा..येथे प्रश्न असा येतो. इंग्लंडच्या संघ व्यवस्थापनाला तर त्याचा हा दोष समजतो, तर आयपीएल संपल्यानंतर लगेचच इंग्लंडला साई सुदर्शनचा हा दोष फलंदाजी प्रशिक्षक आणि इतरांनी का दूर केला नाही? बरं पहिल्या डावातील या चुकीतून तो सुधारला, असेही नाही. दुसऱ्या डावात भले त्याने ३० धावा केल्या; पण डाव्या यष्टीबाहेरचा चेंडू खेळतानाच बाद झाला. या वेळी सोपा झेल शॉर्ट मिडविकेटकडे दिला होता. थोडक्यात काय तर ‘आ बैल मुझे मार’....या पहिल्या कसोटी दोन्ही संघांकडून गोलंदाजी केलेल्या सर्व गोलंदाजांमध्ये सर्वाधिक सरासरीने प्रसिध कृष्णाने धावा दिल्या. शेंडी तुटो वा पारंबी, बॅझबॉलच्या मानसिकतेने इंग्लिश फलंदाज फलंदाजी करतात, हे उघड असताना प्रसिध कृष्णाचा टप्पा मात्र भरकटलेला होता. लय मिळायला वेळ लागू शकतो म्हणून आपण पहिला डाव देवाचा असे म्हणूया; पण येथेही प्रश्न असा उपस्थित होतो, की तथाकथित ग्रेट म्हणून गोलंदाजी प्रशिक्षक नियुक्त केलेले मॉर्ने मॉर्कल काय करत होते? जसप्रीत बुमराने त्याच्या क्षमतेवर पहिल्या डावात पाच विकेट मिळवल्या; पण दुसऱ्या डावात तो निष्प्रभ ठरल्यावर भारताच्या इतर गोलंदाजांची दुर्दशा उघड झाली..Premium| Lavani in Indian Cinema: लावणीचे लावण्य, एका सुवर्णकाळाची सुंदर आठवण .आता थोडं ज्याच्याकडून अधिक अपेक्षा होत्या, त्या करुण नायरबाबत. भारतातील देशांतर्गत क्रिकेटही तेवढेच श्रेष्ठ आहे, हे दाखवून देण्याची जबाबदारी करुण नायरवर आहे; पण तोही पहिल्या डावात शून्य आणि दुसऱ्या डावात चार धावांवर बाद. बरं तो बाद झालेले चेंडू एकदमच अप्रतिम होते, असे नाही. मुळात प्रमुख वेगवान गोलंदाज जखमी असल्यामुळे पहिल्या कसोटीत खेळलेली इंग्लंडची गोलंदाजी तशी दुय्यमच होती. तरीही भारताचा दुसरा त्रिशतकवीर करुण नायर खराब फटका मारून बाद होतो, हे पटत नाही.हा पहिला कसोटी सामना भारताने गमावला त्याची अनेक कारणे आहेत. त्यात भक्कम स्थितीनंतर घसरगुंडी, सुमार क्षेत्ररक्षण आणि स्वैर गोलंदाजी हे ठळकपणे अधोरेखित होते; पण आयपीएल गाजवलेल्या साई सुदर्शन, प्रसिध कृष्णा आणि करुण नायर यांनी थोडे जरी योगदान दिले असते तर चित्र कदाचित वेगळे असते..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

गलितगात्र मोहरे!

Related Stories