मल्याळम चित्रपटसृष्टी संकटात

मल्याळम चित्रपटसृष्टीच्या ग्लॅमरवर सध्या काळे ढग जमा झाले आहेत. लैंगिक शोषण आणि काही कलाकारांकडून दिला जाणारा त्रास यासंबंधीच्या आरोप-प्रत्यारोपांमुळं संपूर्ण मल्याळम चित्रपटसृष्टीच वादाच्या भोवऱ्यात सापडली आहे. याची झळ तमिळनाडूमध्ये असलेल्या तमिळ चित्रपटसृष्टीलाही बसली आहे..एकेकाळी अत्यंत उंचीवर असलेली आणि देशात प्रतिष्ठेच्या स्थानी असलेली मल्याळम चित्रपटसृष्टी लैंगिक शोषणाच्या आरोपामुळे स्तब्ध झाली आहे. मल्याळम चित्रपटसृष्टीतील मोहनलाल, मामुट्टी यांच्यासारखे मोठे कलावंत, तसेच केंद्रिय मंत्रिपदी असलेले सुरेश गोपी यांच्यासारखे सुपरस्टार मात्र या सर्व वादापासून स्वतःला वेगळे ठेवत आहेत.सुरेश गोपी यांनी तर पत्रकारांना यासंदर्भात कुठलेही प्रश्न विचारायचे नाहीत असे बजावले आहे. अत्यंत आक्रमक पद्धतीनं त्यांनी पत्रकारांना यासंबंधीचे प्रश्न विचारण्यापासून रोखलेच; पण काही माध्यमांच्या विरोधात थेट तक्रार देखील दाखल केली. मी जिथे आहे त्यासंदर्भात केवळ प्रश्न विचारा, मी जर माझ्या कार्यालयात असेल तर कार्यालयासंबंधी प्रश्न विचारा, मी घरात असेल तर तसे प्रश्न विचारा..मंदिरात असेल तर त्यासंबंधीचे प्रश्न विचारा; पण सध्याच्या चित्रपटसृष्टीतील वातावरणासंबंधी मला काहीही विचारू नका. सुरेश गोपी यांचा चित्रपट कलाकार म्हणून असलेला भूतकाळ वैभवशाली असूनही त्याबद्दल त्यांना प्रश्न विचारलेले चालत नाहीत. त्यांच्या मुलीच्या लग्नात पंतप्रधान नरेंद्र मोदी यांनी हजेरी लावली होती.सुरेश गोपी यांची प्रतिमा एक दानशूर व्यक्ती म्हणून आहे. मात्र तरीही मल्याळम चित्रपटसृष्टीत सध्या जो पेचप्रसंग सुरू आहे त्याबद्दल कुठल्याही प्रश्नाचे उत्तर देण्यास ते तयार नाहीत. किंबहुना मल्याळम चित्रपटसृष्टीत चाललेल्या वादापासून ते स्वतःला पूर्णपणे बाजूला ठेवत आहेत..अर्थात, सुरेश गोपी यांचीच ही स्थिती आहे असे नाही, तर मल्याळी चित्रपट कलावंतांची जी शक्तिशाली अशी असोसिएशन आहे, ती आता बरखास्त झाली आहे. मोहनलाल यांनी अध्यक्षपदाचा राजीनामा दिला आहे. मामुट्टी आणि मोहनलाल यांनी मल्याळी चित्रपटसृष्टीतील वादापासून स्वतःला वेगळे केले आहे.मल्याळी चित्रपटसृष्टीतील अनेक मान्यवर या वादापासून स्वतःला बाजूला ठेवण्याचाच प्रयत्न करीत आहेत. मामुट्टी यांनी तर सोशल मीडियावर आपली भूमिका स्पष्ट करताना ‘‘तुम्ही सगळ्यांनाच एका मापाने मोजू नका आणि लैंगिक शोषणाच्या प्रकरणामध्ये इंडस्ट्रीतील सर्व लोक आहेत, असे चित्र उभे करू नका, आम्हाला शांततेने जगू द्या,’’ असं थेट आवाहन करून या वादापासून स्वतःला अलिप्त ठेवले आहे..चित्रपटनिर्माते आणि गीतकार श्रीकुमारन थंपी यांनी या वादावर बोलताना पूर्वी दिग्दर्शक आणि अन्य काही कलाकार कोणाला चित्रपटात घ्यायचे याबद्दल ठरवत असत; मात्र आता तथाकथित काही पॉवर सेंटर या निवडींमध्ये हस्तक्षेप करीत असल्यामुळे हा प्रश्न निर्माण झाला आहे, असा आरोप केला आहे.नवीन पोली हा तरुण निर्माता या वादाच्या केंद्रस्थानी आहे. लैंगिक शोषणाचा आरोप त्याच्यावर आणि अन्य सहा जणांवर करण्यात आला आहे. ज्या महिलेने त्याच्यावर बलात्काराचा आरोप केला, तिला आपण भेटलेलो देखील नाही, असे स्पष्टीकरण त्याने दिले आहे. या प्रकरणातून मी माझे निरपराधीत्व सिद्ध करीन आणि कसल्याही परिस्थितीत हा मूर्खपणा थांबविण्यासाठी मी शर्थीने लढा देईन, असे त्याने स्पष्ट केले आहे..मल्याळी चित्रपटसृष्टीतला ज्येष्ठ अभिनेता आणि आमदार मुकेश यांच्यावर व जयसूर्या या दोघांवर लैगिक शोषणाचे आरोप केले आहेत आणि अन्य सहा जण या प्रकरणात सहभागी असल्याचा आरोप या अभिनेत्रीने केलाय. मुकेश याला नुकताच जामीन मिळाला आहे.मुकेश यांच्यावरचे आरोप आणि हेमा समितीचा अहवाल उघड झाल्यावर मल्याळम चित्रपटसृष्टी ढवळून निघाली आहे. या पूर्वीही या चित्रपटसृष्टीत असे आरोप झाले आहेत. मात्र त्याची तीव्रता आता इतकी नव्हती.केरळबाहेरच्या महिला या इंडस्ट्रीत विविध स्वरूपाचे काम मिळविण्यासाठी येतात. त्यांच्याकडून अशा प्रकारचे आरोप केले जात आहेत. विशेष पोलिस पथकाला देखील एका महिलेने आपल्यावर दुबईत अत्याचार झाले, असा जबाब दिला आहे..नवीन पोली याच्यानंतर वादाचा केंद्रबिंदू ठरला आहे तो म्हणजे ६७ वर्षीय अभिनेता मुकेश. मुकेश हा केवळ अभिनेता नसून आमदार आहे. सत्ताधारी मार्क्सवादी कम्युनिस्ट पक्षाचे समर्थक असलेल्या मुकेश याने नुकतीच लोकसभेची निवडणूक लढविली होती. त्यात त्याला पराभव पत्करावा लागला होता. त्याने विधानसभा सदस्यत्वाचा राजीनामा द्यावा, असा आग्रह सगळ्यांकडून धरला गेला आहे. मात्र मुख्यमंत्री पिनाराई विजयन यांनी त्याचे समर्थन केले असून, मुकेश याने राजीनामा देण्याची गरज नाही, अशी भूमिका मांडली आहे.मुकेश याचे वैवाहिक जीवन वादग्रस्त आहे. त्याच्या पहिल्या बायकोने त्याला घटस्फोट दिलेला आहे. त्यानंतर एक प्रसिद्ध नृत्यांगना जी त्याच्याशी रिलेशनमध्ये होती, ती देखील त्याच्याबरोबरचे संबंध तोडून बाजूला झाली; तिनेही मुकेशवर लैंगिक गैरवर्तणुकीचा आरोप केला होता. मुकेश सध्या राज्याबाहेर असून, तो कोचीमध्ये आल्यावर त्याला अटक होण्याची शक्यता आहे..मल्याळम चित्रपटसृष्टीत सध्या जे काही आरोप-प्रत्यारोप आणि लैंगिक शोषणाच्या घटना घडल्या आहेत, त्याची चौकशी करण्यासाठी राज्य सरकारने सात सदस्यांची विशेष समिती नेमली आहे. त्यात चार आयपीएस असलेल्या महिला अधिकारी आहेत. या समितीकडून सध्या विविध लोकांचे जबाब नोंदविण्याचे काम सुरू आहे. यापूर्वी या चित्रपटसृष्टीत घडलेल्या विविध घटनांच्या चौकशीसाठी हेमा समिती नेमली गेलेली होती.या समितीच्या अध्यक्षपदी आंध्र प्रदेशच्या न्यायमूर्ती हेमा या होत्या, तसेच या समितीवर ज्येष्ठ आणि प्रसिद्ध कलाकार शारदा या देखील होत्या. या समितीने अनेक लोकांच्या मुलाखती घेऊन, तसेच अनेक ठिकाणी चौकशी करून अहवाल तयार केला होता. मात्र गोपनीयतेच्या नावाखाली हा अहवाल सरकारने प्रसिद्ध केला नाही. मध्यंतरी माहिती आयोगाच्या निर्णयामुळे हा अहवाल प्रसिद्ध करावा लागला..एकेकाळी केरळचा चित्रपट महोत्सव संपूर्ण देशभर अत्यंत प्रतिष्ठेचा असा मानला गेला होता. मल्याळम चित्रपटसृष्टीतील दिग्गज अदूर गोपाळकृष्णन यांच्यासारख्या व्यक्तीचा देशभर नावलौकिक होता. सध्या मात्र मल्याळम चित्रपटसृष्टी अत्यंत वादात सापडली आहे. त्याचबरोबर चित्रपटनिर्मिती आणि बदललेल्या अनेक गोष्टी यामुळे मल्याळम चित्रपटसृष्टीचे ग्लॅमर झाकोळले गेले.सोशल मीडिया व त्यावरील रील्स यामुळे येथील चित्रपटसृष्टीसमोर मोठी आव्हाने निर्माण झाली आहेत. २०१७ मध्ये देखील मल्याळम चित्रपटसृष्टीतील अनेक लोकांवर अशाच स्वरूपाचे आरोप झाले होते. हेमा समितीचा अहवाल गेली पाच वर्षे दडपला गेला होता. मात्र आता तो अहवाल उघड झाला आहे..मल्याळम चित्रपटसृष्टीतील विविध वाद आणि लैंगिक शोषणाच्या आरोपांविरोधात जे कलाकार उभे आहेत, ते हा प्रश्न आम्ही शेवटपर्यंत तडीला नेऊ, अशा भूमिकेत आहेत. या प्रकरणांचा निकाल काय लागतो याकडे लक्ष द्यावे लागेल आणि सत्य काय यासाठी थांबावे लागेल, हे निश्चित.मल्याळम चित्रपटसृष्टीतल्या महिला कलाकार असोसिएशनच्या सदस्या रिमा कालींगल यांनी या सर्व अन्यायाविरुद्ध लढा देण्याचा निर्धार केलाय. त्यांनी तशी भावनाही ठामपणानं व्यक्त केली आहे. मात्र ही लढाई मोठी आहे..केरळमधील चित्रपटउद्योग बऱ्याच अंशी सरकारच्या ताब्यात आहे. त्यातही या उद्योगावर डाव्या विचारांच्या संघटनांचे वर्चस्व आहे. या संघटनांच्या दबावामुळेच हेमा कमिटीचा रिपोर्ट प्रसिद्ध होऊ शकला नव्हता. आता या चित्रपटसृष्टीत जे वादळ उठले आहे, त्यामुळे प्रतिष्ठेच्या अशा या उद्योगात बरंच काही दडपलं गेलंय याची जाणीव सगळ्यांनाच झाली आहे, हे नक्की.अंतर्गत समस्यांशी झुंजत असली ही चित्रपटसृष्टी आता नव्या वादाला सामोरे जात आहे. मुकेश याची कृत्ये आणि हेमा समितीच्या अहवालातल्या अनेक बाबी आता चर्चेत आल्या असून त्यामुळे सगळी चित्रपटसृष्टी आरोपांच्या वादळात गुरफटली गेली आहे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.