भावनिक गुंत्याचे मौनरंग

- विजयराज बोधनकर, vijayrajbodhankar1964@gmail.comज्येष्ठ चित्रकार संजय अष्टपुत्रे यांच्या चित्रांचे एकल प्रदर्शन जहांगीर आर्ट गॅलरीमध्ये सुरू झाले असून त्यास चांगला प्रतिसाद मिळत आहे. मानवी मनाचा गुंता अशा अनोख्या विषयावर त्यांनी साकारलेली चित्रे रसिकांचे लक्ष वेधून घेत आहेत..दिलीप प्रभावळकर यांनी ‘हसवाफसवी’ नाटकात अनेक भूमिका केल्या. एकाच चेहऱ्यात अनेक चेहरे लपलेले असतात हे त्यांनी जगाला दाखवून दिले आणि तितक्याच ताकदीने त्या भूमिका वठविल्यासुद्धा. मानवी जीवनातले हे सत्य आहे. माणूस दिसतो त्या पलीकडेसुद्धा तो बराच काही असतो. त्याच्या एका चेहऱ्यात अनेक चेहरे लपलेले असतात. तो पुरुष असो वा स्त्री, मनाच्या अनेक भूमिका वाढवीत हा प्रवास सुरू असतो.मानवी मनाचे जगणे कवितेच्या यमकासारखे असते. गझलेच्या दोन ओळींत स्वतंत्र अर्थ असतो. त्याचा पुढील ओळीसोबत अर्थ असतोच असे नाही; पण असे अनेक शेर एकत्र नांदतात आणि त्याची एक गझल तयार होते. मानवी जीवनसुद्धा गझलेसारखे आहे..भिन्न; पण एक... हाच धागा पकडून हैदराबादचे ज्येष्ठ चित्रकार संजय अष्टपुत्रे यांनी ‘Faces Entwined’ (भावनांचा गुंता) असे शीर्षक चित्र प्रदर्शनाला देऊन चित्रमालिका कॅनव्हासवर अवतरीत केली आहे. जसे मानवी मन असते, तसे प्राणी जगताचेही असते. त्यांच्या चित्रात एक मांजर सतत डोकावत असते. गुबगुबीत दिसणारी मांजरसुद्धा अनेक रूपाने त्यांच्या घरात वावरत असते..संजय अष्टपुत्रे म्हणजे स्वतंत्र कलाविष्कार करणारा एक सुंदर परीघ आहे. काव्य, संगीत, शिल्प, चित्र आणि निर्मळ विनोद याचा संपूर्ण परिपाक आहे. कलेचा योग त्यांनी सहजतेने साधला. अष्टपुत्रे यांच्यात कलेची बीजे जन्मतःच होती म्हणून ती सहजतेने संपन्न होत गेली. म्हणूनच त्यांनी कलेचा योग सहजतेने साधला..भुरळ घालणारे ताजे भावरंग त्यांच्या चित्रातून डोकावत राहतात. त्यांच्या भिन्न आणि ताज्या रंगातून एक वेगळेच अवकाश अनुभवता येते. रंगांनाही आपला एक चेहरा असतो आणि चेहऱ्यात किती तरी प्रसन्न छटा त्यांच्या चित्रातून प्रकट होत राहतात. चेहऱ्याच्या आत दडलेले भावरंग कदाचित त्यांना जास्त भावले असावे. रंगरेषांचा ताजेपणा हा त्यांच्या स्वभावाचा मूळ गाभा आहे.चित्र हे चित्रकाराच्या स्वभावाचा आरसाच असतो. स्व-भावातून जन्मलेली कलाकृती ही त्या कलावंताची स्वतंत्र असते. त्याचमुळे त्यांची चित्रे ही चिरंजीव अशी वाटत राहतात. मन बुद्धीत जे आहे तेच रंगरेषेत सापडले, की शुद्ध भाव डोळ्यांना भारावून टाकतो. संगीत ही त्यांची दुसरी आनंदाची बाजू!.संजय अष्टपुत्रे सतार वादन करतात तेव्हा स्वरांचासुद्धा मौनरंग चित्रातून उमटू लागतो. पंचवीस-तीस वर्षांपासून त्यांच्या स्टुडिओत आणि अनेक दिग्गज व्यासपीठावरून त्यांनी शुद्ध भारतीय शास्त्रीय संगीत सतार वादनातून रसिकांना तृप्त केले. जुळलेल्या तारा रंगरेषांच्या असो वा सुरांच्या दोन्हींचा आनंद एकच असतो... सुरातूनसुद्धा रंगांचे अवकाश मनात रुंजी घालत राहतात. अष्टपुत्रे आपल्या कवितेतून म्हणतात, की‘आज साथ शब्दाची मिळालीस्वरांना मी का मुकावे...इंद्रधनुष डोळ्यात माझ्यामग रंगानी का सुकावे....भारतभर आणि भारताबाहेरील देशात अष्टपुत्रे यांची नामवंत आर्ट गॅलरीत २६ सोलो व ५० च्या आसपास ग्रुप चित्र प्रदर्शने झाली असून अनेक नामवंत आर्ट कॅम्पमधून त्यांना आमंत्रित केले गेले होते. अष्टपुत्रे यांनी उत्तम अर्कचित्रकार आणि व्यंगचित्रकार म्हणून काही काळ काम केले. अनेक शिल्पे त्यांच्या हातून निर्माण झालीत. बहुआयामी असलेल्या अष्टपुत्रे यांच्या चित्रांचे प्रदर्शन मुंबईच्या जहांगीर आर्ट गॅलरीत ९ सप्टेंबरपर्यंत रसिकांसाठी खुले असेल.(लेखक चित्रकार आणि व्याख्याते आहेत.).सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.