राष्ट्रवादीच्या पॅनेलला टक्कर देण्यासाठी भाजप मैदानात

सातारा : जिल्हा बॅंकेच्या निवडणुकीत (Satara Bank Election) राष्ट्रवादीच्या सर्वसमावेशक पॅनेलच्या विरोधात भाजप (BJP) प्रणीत सर्वसमावेशक पॅनेलच्या माध्यमातून पर्याय देण्याची व्यवस्था केली आहे. आमदार जयकुमार गोरेंच्या (MLA Jaykumar Gore) नेतृत्वाखाली हे पॅनेल उभे राहणार आहे. यामध्ये सर्व घटकांचा समावेश केला जाणार आहे, अशी माहिती खासदार रणजितसिंह नाईक निंबाळकर (MP Ranjit Singh Naik Nimbalkar) यांनी दिली.

जिल्हा बॅंकेसाठी उमेदवारी अर्ज दाखल केल्यानंतर त्यांच्याशी पत्रकारांनी संवाद साधला. ते म्हणाले, ‘‘जिल्हा बॅंकेच्या निवडणुकीत आम्ही स्वतंत्र पॅनेल देत आहोत. हे पॅनेल भाजप प्रणीत सर्वसमावेशक पॅनेल असून, त्यातून जिल्हा बँकेला पर्याय देण्याचा व्यवस्था केली आहे. आमदार जयकुमार गोरे यांनी या आधी जिल्हा बँकेतील अनेक विषय चव्हाट्यावर आणले आहेत. त्यामुळे जिल्हा जागृत झालेला आहे.

पर्याय म्हणून आमदार जयकुमार गोरे हे या पॅनेलचे नेतृत्व करतील. हे पॅनेल सर्वसमावेशक असून, जिल्ह्यातील सर्व घटकांना सामावून घेतले जाणार आहे. या पॅनेलच्या निमित्ताने अनेक पक्षांची मोट बांधून जिल्हा बँकेत समर्थ पॅनेल देण्याचा प्रयत्न असणार आहे.’’