शपथविधीसाठी गर्दी जमविल्याप्रकरणी जैन ग्रुपच्या अध्यक्षांविरुध्द गुन्हा

फलटण शहर (सातारा) : कोरोना विषाणूच्या पार्श्वभूमीवर जिल्हाधिकाऱ्यांच्या आदेशाचे उल्लंघन करुन पदाच्या शपथविधीसाठी गर्दी जमविल्याप्रकरणी फलटण येथील जैन सोशल ग्रुपचे अध्यक्ष डॉ. सूर्यकांत शांतीलाल दोशी (Dr. Suryakant Shantilal Doshi) यांच्याविरुध्द फलटण ग्रामीण पोलिस ठाण्यात (Phaltan Rural Police Station) गुन्हा नोंद झाला आहे.

या बाबत फलटण ग्रामीण पोलिस ठाण्यातून मिळालेली माहिती अशी, की शनिवार ७ ऑगस्ट रोजी पिंप्रद (ता. फलटण) येथील राष्ट्रबंधू राजीवजी दीक्षित गुरुकुल येथे दुपारी दीडच्या सुमारास जैन सोशल ग्रुप, फलटण यांच्यावतीने डॉ. सूर्यकांत शांतीलाल दोशी यांनी त्यांच्या अध्यक्ष पदाचा व कार्यकारिणीचा शपथविधी समारोह घेतला होता. या कार्यक्रमास जैन सोशल ग्रुपचे अध्यक्ष व सदस्य मिळून पस्तीस ते चाळीस लोक उपस्थित होते.

संबंधितांनी या कार्यक्रमाच्या आयोजनासाठी कुठलीही लेखी अथवा तोंडी परवानगी घेतलेली नव्हती. या कार्यक्रमास बेकायदेशीरपणे लोकांची गर्दी जमा करुन सार्वजनिक ठिकाणी विषाणू संसर्ग व त्याचा प्रादुर्भाव पसरवून, व्यक्तीगत सुरक्षा धोक्यात घातल्याने व जिल्हाधिकाऱ्यांच्या आदेशाचा भंग करुन कोविड संसर्ग साथ रोग पसरु शकतो, हे माहीत असतानाही मानवी जीवितास धोका निर्माण होईल, असे कृत्य केल्याने हा गुन्हा दाखल करण्यात आला आहे. या प्रकरणी पिंप्रदचे पोलिस पाटील सुनिल बोराटे यांनी फिर्याद दिली असून तपास पोलिस नाईक धराडे करीत आहेत.