चार महिन्यांनंतर 'या' शहरात कोरोनाचा शिरकाव

वडूज (जि.सातारा) ः शहरात 70 वर्षीय पुरुष कोरोना बाधित आढळून आल्याने नागरिकांची झोप उडाली आहे. प्रशासनाने परिसरातील 300 मीटर अंतराचा परिसर सूक्ष्म प्रतिबंधात्मक क्षेत्र म्हणून घोषित केला आहे. शहरातील मुलाणवाडा, लोहारवाडा परिसरात रहिवासी असलेल्या 70 वर्षीय वयोवृद्धाचा काही दिवसांपूर्वी कऱ्हाड येथील नातेवाईकांशी संपर्क आला होता.
निवारा शेडमध्येच त्यांनी थाटले संसार

त्यानंतर मंगळवारी (ता. 7) त्यांना ताप, सर्दी, खोकला व धाप लागण्याचा त्रास जाणवू लागल्याने त्यांना सातारा येथील क्रांतिसिंह नाना पाटील सर्वसाधारण रुग्णालयात दाखल करण्यात आले होते. त्याचदिवशी त्यांचा घशातील स्त्रावाचा स्वॅब घेऊन तपासणीसाठी पाठविण्यात आला होता. काल सायंकाळी त्यांचा कोरोना बाधित असल्याचा अहवाल आला. त्यानंतर याठिकाणी नायब तहसीलदार सिताकांत शिर्के, पोलिस उपअधीक्षक बी. बी. महामुनी, गटविकास अधिकारी रमेश काळे, तालुका आरोग्य अधिकारी डॉ. युनूस शेख, नगराध्यक्ष सुनील गोडसे, मुख्याधिकारी माधव खांडेकर, वैद्यकीय अधिकारी डॉ. संतोष मोरे, डॉ. वैशाली माने, पोलिस निरीक्षक अशोक पाटील यांनी भेट दिली.
 
बाधित रुग्णाच्या संपर्कात आलेल्या कुटुंबातील अन्य दहा जणांना मायणीच्या कोरोना हेल्थ सेंटरमध्ये विलगीकरण कक्षात दाखल केले आहे. बाधित रुग्णाच्या संपर्कात आलेल्या व्यक्तींचा स्वॅब आठ दिवसांनी घेतला जाणार असल्याचे वैद्यकीय अधिकाऱ्यांनी सांगितले. दक्षतेचा उपाय म्हणून प्रशासनाने मुलाणवाडा, लोहारवाडा, धान्य बाजार, नगरपंचायत कार्यालय परिसर, तसेच मुख्य बाजार पेठेतून धान्य बाजाराकडे येणारे लहान रस्ते बंद केले, तसेच बाधित रुग्णाच्या वास्तव्याच्या ठिकाणापासून 300 मीटर अंतराचा परिसर सूक्ष्म प्रतिबंधात्मक क्षेत्र म्हणून घोषित केले आहे. गेल्या तीन ते चार महिन्यांत शहरात प्रथमच स्थानिक कोरोना बाधित रुग्ण सापडल्याने खळबळ माजली आहे.

संपादन - संजय शिंदे 

पाचगणीच्या नगराध्यक्षांना डिवचणे राष्ट्रवादीच्या 'या' गटास पडले महागात

बंद ग्रंथालयांमुळे वाचन चळवळीला ब्रेक!, जिल्ह्यात 470 ग्रंथालये उघडण्याच्या प्रतीक्षेत