गांजेतील मृत व्यक्तीची पत्नीही बाधित, चिंता वाढली

कास (जि. सातारा)  : गांजे (ता. जावळी) येथील शनिवारी (ता.13) अचानक मृत्यू झालेल्या क्वॉरंटाइन व्यक्तीचा अहवाल कोरोनाबाधित आला होता. त्यानंतर त्यांच्या निकटच्या सहवासातील त्यांची आई व पत्नीला विलगीकरण कक्षात दाखल केले होते. मंगळवारी (ता.16) रात्री त्यांच्या पत्नीचा अहवालही पॉझिटिव्ह आल्याने गांजेतील रुग्णसंख्या दोनवर पोचली. त्यापैकी पहिली व्यक्ती मृत झाली आहे. 

दरम्यान, बाधित महिलेचे निकट सहवासित तिघे असून, त्यांना सद्यःस्थितीत होम क्वॉरंटाइन करण्यात आले आहे. पहिल्या मृत रुग्णाच्या संपर्कातील 15 जण व महिलेच्या संपर्कातील तिघे अशा 18 जणांना 20 जून रोजी स्वॅब टेस्टसाठी दाखल करणार असल्याचे तालुका आरोग्य अधिकारी डॉक्‍टर भगवान मोहिते यांनी सांगितले. 

गांजे येथील मृत रुग्णाला कसलीही कोरोनाची लक्षणे जाणवली नव्हती. अचानक झटका आल्यासारखे होऊन दवाखान्याच्या वाटेवरच या 48 वर्षीय व्यक्तीचा मृत्यू झाला. आता त्याच्या पत्नीचा रिपोर्टही पॉझिटिव्ह आल्याने गांजे गावची चिंता वाढली आहे. गावातील हायरिस्कमधील एकूण व्यक्‍तींची संख्या 18 झाली असून, लो रिस्कमधील लोकांची संख्या 40 कडे गेली आहे. आता 18 जणांचे अहवाल कसे येणार यावर गांजे गावातील स्थिती लक्षात येणार आहे. 

आशा स्वयंसेविका व अंगणवाडी सेविकांमार्फत रोज घरोघरी जाऊन सर्व्हे करण्यात येत आहे. या सर्व कामासाठी सरपंच लक्ष्मी चिकणे, उपसरपंच दिनकर गायकवाड, ग्रामसेवक एस. के. माने, पोलिस पाटील ललिता चिकणे, तंटामुक्ती समितीचे अध्यक्ष अशोक चिकणे विशेष परिश्रम घेत आहेत. 

संपूर्ण गाव प्रतिबंधित क्षेत्रात 

सध्या संपूर्ण गाव प्रतिबंधित क्षेत्रात असल्याने गावातील व्यवहार पूर्ण शांत आहेत. गावामध्ये सॅनिटायझर फवारणी करण्यात आली आहे. भाजीपाला, औषधे, दूध आदीची व्यवस्था करण्यात आलेली आहे. आता आर्सेनिक अल्बम या गोळ्यांचे वाटप करण्यात येणार आहे.