कऱ्हाड बेसमेंट पाण्याचा प्रश्न चिघळला, गुन्हा दाखल करण्याचे संकेत

कऱ्हाड (सातारा): पालिकेच्या बेसमेंटच्या गाळ्यामध्ये ज्यांचे पाणी साचून राहिले आहेत. त्यांनी ते निचरा न केल्यास त्या लोकांवर थेट गुन्हा दाखल करण्याचे निर्देश मुख्याधिकारी रमाकांत डाके यांनी सोमवारी आरोग्य विभागास दिले. पालिकेच्या माजी आरोग्य सभापती शितल वायदंडे व त्यांचे सहकारी पालिकेत तक्रार घेऊन आले होते. त्यांच्या घरासमोरील बेसमेंटमध्ये साचून राहिलेल्या पाण्याची दुर्गंधी व त्यामुळे डासांचा आरोग्यावर परिणाम होत असल्याचे निदर्शनास आणून दिले. त्यानंतर मुख्याधिकारी डाके यांनी आरोग्य निरीक्षक मिलिंद शिंदे यांना गुन्हा दाखल करण्याचे निर्देश दिले आहेत.

माजी आरोग्य सभापती सौ. वायदंडे यांच्या घराशेजारी एका कॉम्प्लेक्समध्ये पाणी साचते. त्याचा परिसरातील लोकांना त्रास होत आहे. त्यामुळे त्यांनी सोमवारी सर्व सहकाऱ्यांना घेऊन नगरपालिका गाठली. मुख्याधिकारी डाके यांच्यासमवेत त्यांनी बैठक केली. त्यावेळी वस्तुस्थिती दाखवून दिली. या प्रश्नामुळे शहरातील बेसमेंटमध्ये साचणाऱ्या पाण्याचा प्रश्न पुन्हा एकदा ऐरणीवर आला आहे. साचून राहिलेले पाणी निचरा करण्याची जबाबदारी संबंधित मालकांची आहे. ती न झाल्यास गुन्हा दाखल करण्याची प्रक्रिया पालिका करेल, अशी ग्वाही यावेळी मुख्याधिकारी डाके यांनी दिली. मुख्याधिकारी डाके यांनी आरोग्य निरीक्षक शिंदे यांना त्वरीत बोलावून घेतले.

तेथील परिस्थिती समजावून घेतली. आलेली तक्रार व शिंदे यांची माहिती एकसारखी निघाल्यानंतर त्यांनी संबंधित व्यक्तीला दोन दिवसांची नोटीस द्या. नोटीसीनंतर त्या व्यक्तीने पाणी निचरा न केल्यास त्यांच्यावर थेट गु्न्हे दाखल करा असे आदेश मुख्याधिकारी डाके यांनी दिले आहेत. तीच परिस्थिती शहरातील अन्य ठिकाणच्या बेसमेंटमध्ये साचून राहणाऱ्या पाण्याच्या बाबतीतही होणार आहे. त्यामुळे त्याही सर्वांना योग्य त्या नोटीसा देऊन कारवाईचे निर्देश द्यावेत. नोटीसीनंतर कार्यवाही न झाल्यास थेट गु्न्हे दाखल करावेत, असेही आदेशात म्हटले आहेत.