कऱ्हाडला दोन नायब तहसिलदारांसह पाच कर्मचारी पॉझिटीव्ह

कऱ्हाड : कऱ्हाड (जि.सातारा) येथील तहसीलदार काल कोविड पॉझीटीव्ह (covid positive)आले. त्यानंतर त्यांच्या कार्यालयातील शिपायापासून अधिकाऱ्यांपर्यंत सर्वांचीच कोवीड तपासणी करण्यात आली. त्यामध्ये दोन नायब तहसीलदारांसह(deputy tehsildars) पाच कर्मचारी कोविड पॉझीटीव्ह आले आहेत. त्यामुळे खळबळ उडाली आहे.कऱ्हाड तालुक्यात आठवड्यापासून कोविड पॉझीटीव्ह रुग्णांची संख्या वाढू लागली आहे. त्यामुळे तालुक्याची चिंता वाढली आहे.

तहसीलदार विजय पवार हे फिल्डवर कार्यरत असतानाच त्यांना काही त्रास सुरु झाला. त्यांची तपासणी केल्यावर ते स्वतःच पॉझीटीव्ह आले आहेत. त्याचबरोबर त्यांच्या कार्यालयातील एक कर्मचारीही काल बाधीत सापडला होता. त्यानंतर शहरातील नागरी आरोग्य केंद्राच्यावतीने तहसील कार्यालयातील सर्व अधिकारी, कर्मचारी यांची कोरोना चाचणी करण्यात आली. त्यामध्ये दोन नायब तहसीलदारांसह पाच कर्मचारी बाधीत सापडले आहेत. त्यामुळे खळबळ उडाली आहे. यामुळे आता तहसीलदार कार्यालयात कामासाठी येणाऱ्यांनी लसीचे दोन डोस घेतले आहेत का याची तपासणी करुनच आत सोडले जात आहे.(satara Corona Update)

कऱ्हाड तालुक्यातील सर्वांनी कोरोना नियमांचे व प्रशासनाच्या निर्बंधांचे काटेकोरपणे पालन करावे. काही लक्षणे असल्यास तात्काळ कोरोना तपासणी करुन घ्यावी. प्रशासनाचे नियम पाळून सहकार्य करावे.

-उत्तम दिघे प्रांताधिकारी, कऱ्हाड