Koyna Dam : कोयना पाणलोट क्षेत्रात धुवांधार; नवजात 112 मिलिमीटर तर महाबळेश्‍‍वरात 127 मिलिमीटर पावसाची नोंद

पाटण : कोयना धरण (Koyna Dam) पाणलोट क्षेत्रात पावसाचा जोर वाढला आहे. गेल्या २४ तासांत नवजाला ११२ मिलिमीटर व महाबळेश्‍वरला (Mahabaleshwar) १२७ मिलिमीटर पावसाची नोंद झाली आहे. धरण पाणलोट क्षेत्रात संततधार पाऊस पडत असल्याने जलाशयाच्या पाणीसाठ्यात एक टीएमसी पाणीसाठा वाढला आहे.

पावसाने उघडीप न दिल्याने आजही खरिपाच्या पेरण्या बंद राहिल्या. गेली चार दिवस धरण पाणलोट क्षेत्रासह तालुक्यात रिमझिम पावसाच्या सरी पडत होत्या. मॉन्सूनच्या दमदार व मुसळधार पावसाची अपेक्षा अजूनही पूर्ण झालेली नाही, त्यामुळे पाणीसाठ्यात संथ गतीने वाढ होत आहे.

रात्रीपासून पावसाचा जोर धरण पाणलोट क्षेत्रात वाढला आहे. त्यामुळे गेल्या २४ तासांत कोयनानगर येथे ७३ मिलिमीटर, नवजाला ११२ मिलिमीटर व महाबळेश्‍वरला १२७ मिलिमीटर पावसाची नोंद झाली आहे. धरणाचा एकूण पाणीसाठा १२.२१ टीएमसी झाला असून, पाणीपातळी २०३३.१० फूट झाली आहे.

२७ जूनला पायथा वीजगृहातून होणारा एक हजार, ५० क्यूसेस विसर्ग वाढवून पायथा वीजगृह पूर्ण क्षमेतेने सुरू करून दोन हजार १०० क्यूसेस पाण्याचा विसर्ग कोयना नदीपात्रात करण्यास सुरुवात केली होती. आज सकाळी पुन्हा पायथा वीजगृहातून होणारा एक हजार ५० क्यूसेस करण्यात आला आहे.

कोयना धरण पाणलोट क्षेत्रासह घाटमाथ्यावर संततधार पाऊस पडत असल्याने जलाशयाच्या पाणीसाठ्यात एक टीएमसी पाणीसाठा वाढला आहे. गेली चार दिवस कधी उघडीप तर कधी रिमझिम पाऊस यामुळे वापसा मिळेल, त्यावेळी शेतकरी खरिपाच्या पेरण्या करता होता.

आज सकाळी पावसाने थोडी उघडीप दिल्याने शेतकऱ्यांनी पेरणीस सुरुवात केली होती. मात्र, पुन्हा दुपारी पावसाच्या सरी येऊ लागल्या आणि खरिपाच्या पेरणीत व्यत्यय आला. तीन आठवडे खरीप हंगामातील पेरण्या यावर्षी उशिरा झाल्या आहेत. अजून मोठ्या प्रमाणावर खरीप हंगामातील क्षेत्रावर पेरणी झालेली नाही.

मुसळधार पाऊस पडला तर मात्र पेरणीविना क्षेत्र पडून राहील, असे चित्र निर्माण झाले आहे. मॉन्सूनच्‍या पावसाचे उशिरा आगमन झाल्‍याने तीन आठवडे खरीप हंगामातील पेरण्या उशिरा आणि आता पेरणीसाठी आवश्यक उघडीप मिळत नसल्याने बळीराजाला पेरण्या पूर्ण कशा होतील? याची काळजी लागून राहिली आहे.