कुत्र्याला जेवण न दिल्याने वेटरवर चाकूने हल्ला; सांगलीच्या एकावर गुन्हा

वहागाव : सोबत आणलेल्या कुत्र्याला (Dog) जेवण देण्यास नकार दिल्याने वेटरवर चाकू हल्ला झाला. येथील राजधानी ढाब्यावर काल रात्री उशिरा प्रकार घडला. त्याप्रकरणी तळबीड पोलिसात (Talbeed Police) गुन्हा दाखल आहे. रूपेश बावधनकर (रा. सांगली) असे याप्रकरणी गुन्हा दाखल झालेल्याचे नाव आहे. संजय नाटेकर (वय ३२, रा. मार्केटयार्ड, कऱ्हाड) यांनी फिर्याद दिली आहे.

पोलिसांनी सांगितले की, काल रात्री उशिरा वहागाव येथील राजधानी ढाब्यावर रूपेश बावधनकर (Rupesh Bavdhankar) जेवायला थांबले होते. त्यावेळी संजय नाटेकर त्यांच्याजवळ गेले. त्यांनी मालकाचे कुत्र्याला जेवण देण्यास नकार दिला. त्यावेळी बावधनकरने वेटरबरोबर वाद घातला. त्याला शिवीगाळ केली.

रूपेशने हॉटेलमधील (Hotel) चाकू हातात घेऊन नाटेकरच्या गळ्याच्या बाजूला मारला. संजयच्या मानेवर जखम झाली आहे. मालक चेतन जाधव यांनी नाटेकरला रुग्णालयात दाखल केले. तेथे त्याच्यावर उपचार सुरू आहेत. त्याबाबत नाटेकरने घटनेची फिर्याद पोलिसात दिली आहे.