Maratha Reservation : आरक्षणासाठी मराठा समाज आक्रमक; जरांगे-पाटलांच्या आदेशाचं पालन करत गावा-गावांत साखळी उपोषण सुरु

कऱ्हाड : मराठा आरक्षणाचे लोण महाराष्ट्रात पसरले आहे. मनोज जरांगे-पाटील यांनी मराठा आरक्षणासाठी सरकारला जाग आणण्यासाठी आजपासून महाराष्ट्रात साखळी उपोषण सुरु करण्याचे आवाहन मराठा समाजाला केले होते. त्यानुसार आज कऱ्हाड (जि. सातारा) शहरासह तालुक्याती अनेक गावांत साखळी उपोषण सुरु करण्यात आले आहे.

मराठा समाजाला ओबीसीमधूनच आरक्षण मिळावे, यासाठी मनोज जरांगे-पाटील यांनी महाराष्ट्रभर दौरे करुन जनजागृती करण्याची मोहीम हाती घेतली आहे. राज्यातील सर्वांत मोठा बहुसंख्य समाज असूनसुद्धा या समाजातील असंख्य युवक रोजगारापासून वंचित राहिलेले आहेत. यामुळे मराठा समाज आर्थिकदृष्ट्या व शैक्षणिकदृष्ट्या खूपच मागास राहिलेला आहे.

जरांगे-पाटील यांच्या कऱ्हाड (जि. सातारा) येथील जाहीर सभेत त्यांनी मराठा समाजाच्या आरक्षणासाठी सरकारला २४ डिसेंबरला अल्टिमेटम देण्यात आला आहे. त्यानंतर काय करायचे हे आपण सर्वजण ठरवू. मात्र, सरकारला त्या तारखेची आठवण रहावी आणि आरक्षण देण्यासाठी वेगाने हालचाली कराव्या यासाठी एक डिसेंबरपासून गावोगावी साखळी उपोषण सुरु करा, असे आवाहन केले होते.

त्यानुसार आजपासून गावोगावी साखळी उपोषण सुरु करण्यात आली आहेत. त्याअंतर्गत आज कऱ्हाड शहरातील साखळी उपोषणाची सुरुवात दत्त चौकातील छत्रपती शिवाजी महाराजांच्या पुतळ्यास पुष्पहार अर्पण करून करण्यात आली. त्याचबरोबर तालुक्यातील सैदापूर, खोडशी, मलकापूर परिसरासह तालुक्यातील अनेक गावांत साखळी उपोषण सुरु करण्यात आले आहेत. त्यामुळे चांगलीच वातावरण निर्मिती झाली आहे.