कऱ्हाड: बाजार समिती, खरेदी-विक्री संघाने सोयाबीन खरेदी करावी

कऱ्हाड : सोयाबीनचे दर गडगडले नसुन ते व्यापाऱ्यांनी संगनमताने पाडले आहेत. शेतकऱ्यांना दिलासा देण्यासाठी व त्यांची लूट थांबवण्यासाठी बाजार समित्या व सहकारी खरेदी विक्री संघांनी सोयाबीन योग्य भावाने खरेदी करुन व्यापाऱ्यांच्या मनमानीला पायबंद घालावा, अशी मागणी तालुक्यातील शेतकऱ्यांनी सहकार मंत्री बाळासाहेब पाटील यांच्याकडे निवेदनाव्दार केली.

शेतकरी शिवाजी पाटील, विश्वजित थोरात, रवींद्र यादव, दत्तात्रय थोरात, दादासाहेब पाटील, पंढरीनाथ माने, सचिन महाडिक, अनिल साळुंखे आदींनी निवेदन दिले. निवेदनाची प्रत उपनिबंधक यांनाही देण्यात आले.

निवेदनातील माहिती अशी

बाजार समित्या व खरेदी विक्री संघ हे शेतकऱ्यांनी शेतकऱ्यांच्यासाठी स्थापन केलेल्या संस्था आहेत. मात्र आज या संस्थांवर व्यापाऱ्यांनी कब्जा केला असून अडते,दलाल यांची मनमानी सुरू आहे. यंदा अस्मानी संकटाने खरीप पिके, ऊस पिकाला मोठा फटका बसला. अशातच सोयाबीन हे अडचणीच्या वेळेला चार पैसे मिळवून देणारे कमी कालावधीचे पीक म्हणून ते पिक शेतकरी करतात. त्याची काढणी सुरु असुन सोयाबीन मोठया प्रमाणावर मार्केटमध्ये आणत आहेत. मात्र दुर्दैवाने भाव निच्चांकी पातळीवर पाडण्यात आले आहेत.

काही ठिकाणी वजनातील तूट, काटामारी करून शेतकऱ्यांना लुटले जात आहे. बाजार समिती, खरेदी विक्री संघ यांच्या आवारातच शेतकऱ्यांना लुटले जात आहे. शेतकरी आर्थिक दृष्ट्या प्रचंड नुकसानीत येत आहे. त्यामुळे बाजार समिती, सहकारी खरेदी विक्री संघ, शेतकरी सहकारी संघ यांना सहकारमंत्री यांनी आदेश देऊन सोयाबीन खरेदी केंद्रे सुरू करण्यास भाग पाडावे.