रहिमतपूर : सासुर्वे (ता. कोरेगाव) येथील हुतात्मा जवान हवालदार प्रवीण अंकुश वायदंडे यांच्या पार्थिवावर शासकीय इतमामात अंत्यसंस्कार करण्यात आले. अरुणाचल प्रदेशातील चीन सीमारेषेवर देशसेवेचे कर्तव्य बजावताना जखमी झाल्यानंतर त्यांच्यावर गुवाहाटीतील लष्करी रुग्णालयात उपचार सुरू होते. उपचारादरम्यान शनिवारी (ता. १६) त्यांची प्राणज्योत मालवली. आज त्यांचे पार्थिव सैन्य दलाच्या ताफ्यासह मूळगावी आणण्यात आले. शासकीय इतमामात व शोकाकूल वातावरणात त्यांच्या पार्थिवावर अंत्यसंस्कार करण्यात आले.