'तुम्हाला बघितल्यानंतर पारणंच फिटतं', भर मंचावर उदयनराजेंच्या डोळ्यात पाणी

सातारा : वेगळ्या शैलीसाठी प्रसिद्ध असलेले साताऱ्याचे खासदार उदयनराजे भोसले (MP Udayanraje Bhosale) पुन्हा एकदा चर्चेत आले आहेत. शहरातील वॉर्डामध्ये विकासकामांच्या निमित्तानं उदयनराजेंचा जोरदार राबता सुरूय. सातारा नगर पालिकेच्या नवीन इमारतीचं भूमिपूजन खासदार उदयनराजे यांच्या हस्ते नुकतंच करण्यात आलं. मात्र, या भूमिपूजन कार्यक्रमादरम्यान बोलताना खासदार उदयनराजे भावूक झाल्याचं पहायला मिळालं.

सातारकर आणि कार्यकर्त्यांचं आभार मानत असताना उदयनराजेंना आपले अश्रू रोखते आले नाही, ते व्यासपीठावरच सातारकरांना 'ऑलवेज देअर फॉर यू' म्हणत माझ्यावर जीव लावणाऱ्यांची मी कशी परतफेड करु? असं म्हणत त्यांनी अश्रूंना वाट मोकळी करुन दिली. त्यामुळं संपूर्ण वातावरण भावनिक झालेलं बघायला मिळालं. उदयनराजे पुढे बोलताना म्हणाले, ऑलवेज देअर फॉर यू. मनापासून.. काय बोलायचं.. तुम्हाला बघितल्यानंतर पारणं फिटतं ना, तसं झालंय. शप्पथ सांगतो, मनापासून एवढा जीव लावला ना तुम्ही त्याची कशी परतफेड करु मला माहिती नाही. मी कामाच्या स्वरुपानं ते करतो आहे. मनापासून आय लव्ह यू टू मच.. इन्फिनिटिव्ह, असं बोलून आपल्या अश्रूंना वाट मोकळी करुन दिली.

उदयनराजे हे साताराच (Satara) नव्हे, तर राज्यभरातील जनतेचा औत्सुक्याचा विषय असतो. राजकीय परिणामांची भीती न बाळगता त्यांनी केलेल्या अनेक वक्तव्यांमुळे यापूर्वी राज्यात धुरळा उडवून दिला होता. मजबूत शरीरयष्टी, भेदक नजर, तडकाफडकी जागेवर निकाल लावण्याच्या त्यांच्या वृत्तीचा साताऱ्यात नेहमीच बोलबाला असतो. आमदार शिवेंद्रराजे आणि खासदार उदयनराजे या दोन्ही भावांमध्ये गेल्या काही दिवसांपासून राजकीय मतभेद निर्माण झाले आहेत. त्यातूनच ते एकमेकांवर भर मंचावर किंवा सार्वजनिकरित्या टीका करत असल्याचं समोर आलंय. शिवेंद्रराजेंनी (Shivendrasinharaje Bhosle) काही दिवसांपूर्वी उदयनराजेंवर टीका केली होती. त्यानंतर उदयनराजेंनीही शिवेंद्रराजेंचा चांगलाच समाचार घेतला होता.