Shambhuraj Desai : नाम तो सुना ही होगा, शंभूराज! पाटणकरांच्या एकहाती सत्तेला पालकमंत्र्यांकडून 'सुरुंग'

मोरगिरी (सातारा) : पालकमंत्री शंभूराज देसाई (Shambhuraj Desai) यांच्या नेतृत्वाखालील लढलेल्या पाटण कृषी उत्पन्न बाजार समिती निवडणुकीत शेतकरी विकास परिवर्तन पॅनेलनं 18 पैकी 15 जागा जिंकत पाटणकरांच्या एकहाती सत्तेला सुरुंग लावला.

पाटण तालुक्याचे युवा नेते यशराज देसाई (Yashraj Desai) यांनी आखलेल्या रणनितीपुढं विरोधकांनी 45 वर्ष पाळमुळे रोवलेल्या बाजार समिती निवडणुकीत सत्तांतर झाल्यानं पाटणकरांना धक्का मानला जात आहे.

निवडणुकीत यशराज देसाईंनी दिलं स्वत:ला झोकून

लोकनेते बाळासाहेब देसाई कारखान्याचे अध्यक्ष यशराज देसाई यांनी या निवडणुकीत स्वत:ला झोकून देत विभागवार मेळावे आणि सभांचं आयोजन केलं होतं. सुरूवातीपासून निकाल लागेपर्यंत प्रत्येक मतदार यांचा आढावा, तसेच आपली भूमिका मतदारापर्यंत पोहचवताना त्यांनी निवडणूक रणनिती आखली होती.

पालकमंत्री देसाईंनी 45 वर्षानंतर मारली बाजी

परंतु, 45 वर्ष कृषी उत्पन्न बाजार समितीवर माजी मंत्री विक्रमसिंह पाटणकर यांची सत्ता आहे. त्यामुळं महाविकास आघाडीचे तगडे आव्हान देसाई गटापुढं होतं. त्यामुळं पाटणकरांच्या ताब्यातील बाजार समिती घेण्यात पालकमंत्री शंभूराज देसाई यांना यश मिळणार का याबाबत तालुक्यातील जनतेत उस्तुकता होती. नुकत्याच लागलेल्या बाजार समिती निवडणूक निकालानं पालकमंत्री देसाई यांनी 45 वर्षानंतर बाजी मारली आहे.

पाटणकरांना मोठा धक्का

पाटण कृषी उत्पन्न बाजार समितीमध्ये 15/3 असं सत्तांतर झालं असून या निवडणुकीत शिंदे गटाच्या शिवसेनेनं 15 जागेवरती निर्विवाद विजय मिळवला आहे. पाटणकर गट 3 जागांवर विजयी झालं आहे. शेतकरी विकास परिवर्तन पॅनेलनं 18 पैकी 15 जागा जिकंत पाटणकरांच्या एकहाती सत्तेला सुरुंग लावला. पाटण तालुक्याचे युवा नेते यशराज देसाई यांनी आखलेली रणनितीपुढं विरोधकांनी 45 वर्ष पाळमुळे रोवलेल्या बाजार समिती निवडणुकीत सत्तांतर झाल्यानं पाटणकरांना धक्का मानला जात आहे.