esakal | Sakal - Read Latest Breaking Marathi News from Maharashtra India & Around the World
sakal

बोलून बातमी शोधा

Ajit Pawar

राष्ट्रवादीतील नेत्यांनी सर्वसमावेशक पॅनेलच्या माध्यमातून निवडणूक बिनविरोधचा फंडा काढलाय.

दादा, आम्हालापण 'संचालक' करा की..

sakal_logo
By
उमेश बांबरे

सातारा : जिल्हा बॅंकेच्या निवडणुकीसाठी (Satara Bank Election) राष्ट्रवादीतील (NCP) इच्छुकांनी उपमुख्यमंत्री अजित पवार (Ajit Pawar) यांची त्यांच्या दौऱ्यात भेट घेऊन उमेदवारी देण्याची मागणी केली. यामध्ये कोरेगाव, खटाव, माण तालुक्यांतील सर्वाधिक इच्छुकांचा समावेश आहे. विधान परिषदेचे सभापती रामराजे नाईक-निंबाळकर (Speaker Ramraje Naik-Nimbalkar) व पालकमंत्री बाळासाहेब पाटील (Minister Balasaheb Patil) यांच्यावर श्री. पवार यांनी बॅंकेच्या निवडणुकीबाबतचा निर्णय सोपविला आहे. त्यामुळे सभापती रामराजे व पालकमंत्री या इच्छुकांना संधी देणार का, याची उत्सुकता लागली आहे.

जिल्हा बॅंकेच्या निवडणुकीसाठी मतदारांची अंतिम यादी प्रसिद्ध झाली आहे. आता दहा दिवसांनंतर म्हणजे १८ ऑक्टोबरच्या दरम्यान निवडणूक कार्यक्रम लागण्याची शक्यता आहे. त्यामुळे सर्वच पक्षांनी यामध्ये लक्ष घालण्यास सुरवात केली आहे. बॅंकेत पक्षीय राजकारण नको, असे म्हणत राष्ट्रवादीतील नेत्यांनी सर्वसमावेशक पॅनेलच्या माध्यमातून निवडणूक बिनविरोधचा फंडा काढला आहे. अद्यापपर्यंत भाजपकडून कोणतीच भूमिका स्पष्ट झालेली नाही. भाजपमध्ये असलेले आठ संचालक जिल्हा बॅंकेत आहेत. तर उर्वरित राष्ट्रवादीचे संचालक आहेत. भाजपचे पॅनेल होऊच नये, यासाठी विधान परिषदेचे सभापती रामराजे नाईक-निंबाळकर व पालकमंत्री बाळासाहेब पाटील हे प्रयत्नशील आहेत. त्यासाठी त्यांनी आमदार जयकुमार गोरे व खासदार उदयनराजे भोसले यांना रोखण्याचे प्रयत्न चालविले आहेत. पण, अद्यापपर्यंत तरी त्यांना यश आलेले नाही.

हेही वाचा: बाळासाहेबांचं ऋण राष्ट्रवादी कधीही विसरू शकणार नाही : अजित पवार

तर दुसरीकडे जिल्हा बॅंकेत नेहमी ठरलेले संचालक निवडून आणले जातात. त्यामुळे यावेळेस राष्ट्रवादीतील दुसऱ्या फळीतील नेत्यांना संचालक म्हणून संधी मिळावी, अशी मागणी यावेळेस जोर धरू लागली आहे. अशा इच्छुकांनी नुकत्याच उपमुख्यमंत्री अजित पवार यांच्या दौऱ्यात त्यांना भेटून आम्हाला जिल्हा बॅंकेत संचालक म्हणून घ्या, अशी मागणी केली आहे. याबाबतची काहींनी निवेदनेही दिली आहेत. यामध्ये सातारा, कोरेगाव, खटाव, माण व कऱ्हाड उत्तरमधील राष्ट्रवादीच्या पदाधिकाऱ्यांचा समावेश आहे. अजित पवार यांनी दौऱ्यावेळी जिल्हा बॅंकेच्या निवडणुकीत विधान परिषदेचे सभापती रामराजे नाईक-निंबाळकर, पालकमंत्री बाळासाहेब पाटील, आमदार शशिकांत शिंदे व मकरंद पाटील हे एकत्र बसून निर्णय घेतील, असे स्पष्ट केले आहे. त्यामुळे जरी अजित पवारांकडे काहींनी संचालकपदी संधी देण्याची मागणी केलेली असली तरी रामराजे व पालकमंत्री त्यांची मागणी मान्य करणार का, हा प्रश्न महत्त्‍वाचा आहे.

हेही वाचा: भाजपला 'जोर का झटका'; मुंडण करत आमदाराची पक्षाला सोडचिठ्ठी

अजितदादा इच्छुकांचे स्वप्न पूर्ण करणार?

राष्ट्रवादीच्या विरोधात दुसरे पॅनेल जिल्हा बॅंकेत पडेल, याची शक्यता अद्यापपर्यंत तरी स्पष्ट झालेली नाही. त्यामुळे इच्छुकांना दुसऱ्या पॅनेलचा पर्याय नसल्याने नेत्यांनी मनात आणले तरच संधी मिळणार आहे. या इच्छुकांना राखीव व संस्था मतदारसंघातून संचालक व्हायचे आहे. त्यामुळे अजित पवार या इच्छुकांचे संचालक होण्याचे स्वप्न पूर्ण करणार का, याकडे या सर्वांचे लक्ष लागले आहे.

loading image
go to top