Satara : 'राजकारण्यांनो.. मराठा समाजाला ओबीसींचे दाखले देऊ नका, अन्यथा तुम्हाला मतदान करणार नाही'

सातारा : मराठा समाजाला (Maratha Community) कोणत्याच आयोगाने सामाजिक, शैक्षणिक व आर्थिक मागास असल्याचे म्हटलेले नाही. न्यायालयानेही मराठा समाजाचे आरक्षण नाकारलेले असताना ओबीसींच्या आरक्षणात घुसखोरी करत आहेत. त्यामुळे मराठा समाजाला ओबीसींचे दाखले देऊ नये, या मागणीसाठी सातारा जिल्हा ओबीसी संघटनेने जिल्हाधिकारी कार्यालयासमोर निदर्शने केली.

जिल्हा ओबीसी संघटनेचे (OBC Association) अध्यक्ष भरत लोकरे यांच्या नेतृत्वाखाली झालेल्या आंदोलनात कार्याध्यक्ष संजय पोतदार, महासचिव प्रमोद क्षीरसागर, रामचंद्र वनवडे, भानुदास वास्के, संजय पोतदार, सुनीता दीक्षित, श्रीकांत आंबेकर, संजय परदेशी, अनिल लोहार, चंद्रकांत सुतार, डॉ. मकरंद पोरे, राहुल कुंभार, राजेंद्र चोरगे, मुरलीधर पवार, मोहनराव टोणपे, लक्ष्मण वीर, विश्‍वास सावंत, दत्तात्रय यादव, अरुणा यादव आदी सहभागी झाले होते. यावेळी जोरदार घोषणाबाजी करण्यात आली.

यावेळी मुख्यमंत्र्यांना देण्यासाठी जिल्हाधिकारी कार्यालयात दिलेल्या निवेदनात संघटनेने म्हटले आहे, की शासनाने मराठा समाजाला ओबीसीमध्ये न घालता त्यांच्या विकासासाठी इतर योजना राबवाव्यात. आरक्षण हा गरिबी हटविण्याचा कार्यक्रम नाही, हे राजकारण्यांनी लक्षात घ्यावे. मराठा समाजाला ओबीसींचे दाखले देऊ नयेत. आमच्या मागणीचा विचार केला नाही तर ओबीसी समाज राज्यभर रस्त्यावर उतरून आंदोलन करेल, तसेच ओबीसी समाज तुम्हाला मतदान करणार नाही, असा इशारा दिला आहे.